Max Warmerdam leiðir Reykjavíkurskákmótið. Ljósmynd/Skáksamband Íslands
Hollenski stórmeistarinn Max Warmerdam, 22 ára, leiðir nú Kviku Reykjavíkurskákmótið sem stendur yfir þessa dagana í Hörpu.
Forystan kemur nokkuð á óvart en Wamerdam á góðu gengi að fagna og er með sex vinninga af átta en hann er áttundi stigahæsti keppandinn, með 2.599 elostig.
Sextán ára stórmeistarinn og undrabarnið Rameshbabu Praggnanandhaa fylgir fast á eftir Warmerdam ásamt fjórum öðrum; þeim Mads Andersen, Taniu Sachdev, Idani Pouya og Matthieu Cornette.
Alls taka þátt 245 keppendur frá 50 löndum í Reykjavíkurmótinu – mótið er vel þekkt í skákheiminum og hefur skipað sig ofarlega á lista yfir bestu opnu skákmót heims hjá Samtökum atvinnuskákmanna (ACP).
Keppendur á Reykjavíkurskákmótinu
Fjölbreyttur hópur tekur þátt í Reykjavíkurskákmótinu og verða hér nokkrir nefndir á nafn:
Rameshbabu Praggnanandhaa (2624)
Praggnanandhaa er sextán ára undrabarn frá Indlandi og fimmti yngsti stórmeistari allra tíma. Hann hefur ekki látið sig vanta á Reykjavíkurskákmótið undanfarin ár. Óhætt er að segja að mótið njóti vinsælda meðal sterkra indverskra skákmanna í ár en fimm af sjö stigahæstu keppendunum koma þaðan. Hann er í öðru sæti í mótinu ásamt fleirum, með 5 og hálfan vinning.
Ljósmynd/Þorsteinn Magnússon
Tania Sachdev (2392)
Indverska skákdrottningin Tanya Sachdev er þekkt innan skákheimsins og hefur látið til sín taka sem álitsgjafi og skýrandi í skákmótum. Hún er alþjóðlegur meistari og stendur sig vel í mótinu, í öðru sæti ásamt öðrum, með fimm og hálfan vinning.
Tania Sachdev Ljósmynd/Þorsteinn Magnússon
Idani Pouya (2638)
Indverski stórmeistarinn Idani Pouya er stigahæsti keppandi mótsins og fylgir fast á eftir hinum unga Warmerdam, með fimm og hálfan vinning en þeir mætast einmitt á morgun í áttundu umferð. Verður eflaust spennandi viðureign.
Idani Pouya Ljósmynd/Þorsteinn Magnússon
Anna Bellon Cramling (2057)
Anna Cramling er ung og efnileg skákkona frá Svíþjóð, fædd 2002. Hefur hún ekki síst vakið athygli fyrir sitt vinsæla skákstreymi á Twitch en þar hefur hún hvorki meira né minna en 202 þúsund fylgjendur.
Anna Cramling Ljósmynd/Þorsteinn Magnússon
Diana Mirza (1905)
Diana Mirza er ung og ekki síður efnileg skákkona frá Írlandi, sem teflir nú í annað skiptið á Reykjavíkurskákmótinu. Varð hún fyrsti heimsmeistari Íra í skák þegar hún hreppti titilinn í U17 heimsmeistaramóti grunnskóla árið 2017.
Diana Mirza Ljósmynd/Þorsteinn Magnússon
Áttunda umferð Reykjavíkurmótsins hefst í Hörpu klukkan 16.00 í dag og eru áhorfendur velkomnir.
