Aðeins 27% eftir af þorskkvótanum

0
118

200 mílur | Morgunblaðið | 13.4.2023 | 8:15

Björg EA hefur landað mestum þorski það sem af er fiskveiðiári. mbl.is/Þorgeir Baldursson

Alls hefur íslenski fiskiskipaflotinn landað 121.776 tonnum af þorski sem er rétt rúmlega 73% af úthlutuðum aflaheimildum í tegundinni fyrir fiskiveiðiárið 2022/2023 sem lýkur 31. ágúst næstkomandi. Þetta kemur fram í aflastöðulista Fiskistofu sem fjallað er um í Morgunblaðinu í dag.

Þá hefur flotinn einnig landað 72% af ýsukvótanum eða 36.296 tonnum. Aðeins eru eftir rúm 44 þúsund tonn af þorski og 14 þúsund tonn af ýsu.

Horfurnar eru allt aðrar í tilfelli ufsans en gefinn var út 72.564 tonna kvóti í tegundinni en einungis hefur verið landað 23.614 tonnum eða 33% af kvótanum. Jafnframt hafa 59% af útgefnum heimildum í karfa verið nýtt og hafa íslensku fiskiskipin landað 14.571 tonni í tegundinni.