-2 C
Grindavik
20. janúar, 2021

Adolf Hitler sigraði í kosningum til héraðsstjórnar

Skyldulesning

Kosningar til þýska þingsins 1933 voru örlagaríkar því þær mörkuðu þáttaskil og voru nokkurs konar aðgöngumiði nasistans Adolfs Hitlers til valda í landinu. Flestir þekkja eflaust þá sögu og þann hrylling sem ríkti á valdatíð hans, þar á meðal gyðingaofsóknir og síðari heimsstyrjöldin. En í síðustu viku sigraði nafni hans í héraðskosningum í Nambibíu með miklum yfirburðum. Sigur sem hefði eflaust ekki vakið mikla athygli nema fyrir nafn mannsins.

Hann heitir fullu nafni Uunona Adolf Hitler og fékk 85% atkvæða í kjördæmi sínu og tryggði sér þar með sæti í héraðsstjórninni. Í samtali við þýska blaðið Bild sagðist hann ekki hafa nein tengsl við hugmyndafræði þýska nafna síns. „Bara það að ég ber þetta nafn er ekki ávísun á að ég vilji leggja Oshana (héraðið sem hann bauð sig fram í, innsk. blaðamanns) undir mig. Það þýðir ekki að ég sækist eftir heimsyfirráðum,“ sagði hann.

Namibía var áður þýsk nýlenda og er Adolf Hitler ekki óalgengt nafn þar að sögn Uunona Adolf Hitler. „Faðir minn skýrði mig eftir þessum manni. Hann skildi líklega ekki hvað Adolf Hitler stóð fyrir. Þegar ég var barn fannst mér þetta mjög venjulegt nafn. Það var ekki fyrr en ég varð eldri sem ég skildi að þessi maður vildi leggja heiminn undir sig. Ég tengist engu slíku,“ sagði hann og bætti við að eiginkona hans kalli hann Adolf og að hann hafi ekki í hyggju að breyta nafni sínu.

Innlendar Fréttir