Ætlar að gera kökupinna fyrir fermingarveisluna sína – DV

0
120

Fermingarnar eru að fara á fullt og í tilefni þess heimsækir Sjöfn Þórðar þáttastjórnandi þáttarins Matur og heimili mæðgur sem eru í óðaönn að klára lokaundirbúninginn fyrir stóra daginn.

Elín Heiða Hermannsdóttir fermist 26.mars næstkomandi í Lágafellskirkju í Mosfellsbæ og er búin að standa í ströngu í undirbúningnum fyrir stóra daginn með móður sinni Berglindi Hreiðarsdóttir matarbloggara meiru sem heldur úti síðunni Gotteri og gersemar.

„Þetta er búið að vera ótrúlega skemmtilegur tími og undirbúningurinn hefur gengið vel,“ segir Elín Heiða. Elín Heiða gaf út bókina Börnin baka fyrir tveimur árum með móður sinni og ætlar meðal annars að sjá um að gera hluta af kræsingunum í veisluna sjálf. „Ég ætla að gera kökupinna og síðan ætla ég líka að gera skinkuhorn.“

Berglind segir að dóttir hennar hafi sjálfstæðar skoðanir og hafi nánast alveg ráðið för þegar kom að því að setja upp stóra daginn og undirbúa ferminguna. „Hún hefur fyrirmyndina af fermingarveislu stóru systur sinnar en kemur líka með sínar persónulegu áherslur í sinni veislu sem framundan er,“ segir Berglind og brosir.

Meira um fermingarundirbúninginn og hvernig veislan hennar Elínar Heiðu á að vera í þættinum Matur og heimili á Hringbraut í kvöld, fyrst klukkan 19.00 og aftur klukkan 21.00.

Brot úr þætti kvöldsins má sjá hér:

Matur og heimili 14. mars 2023 – stikla