4 C
Grindavik
9. maí, 2021

Aflaverðmæti Blængs 150 milljónir króna

Skyldulesning

Blængur NK í höfn í Neskaupstað.

Ljósmynd/Hákon Ernuson

Löndun hófst úr frystitogaranum Blængi NK í Neskaupstað eftir hádegi í dag. Kom hann með 675 tonn að landi. „Þessi veiðiferð gekk vel, held ég að óhætt sé að segja,“ er haft eftir Theodóri Haraldssyni skipstjóra á Blængi á vef Síldarvinnslunnar.

Þar segir að Blængur sigldi inn á Norðfjörð í blíðunni í gær að lokinni veiðiferð og að skipið hafi legið á firðinum í gærdag þar sem það var þrifið hátt og lágt.

„Við fórum út að kvöldi 21. mars þannig að veiðiferðin var 21 dagur höfn í höfn. Almennt aflaðist vel og við komum með stútfullt skip. Aflinn er 675 tonn upp úr sjó eða 21.000 kassar að verðmæti 150 milljónir. Uppistaða aflans er djúpkarfi, gullkarfi og gulllax en einnig er dálítið af ufsa, ýsu og þorski,“ segir Theodór.

Skipstjórinn segir að um fínasta túr sé að ræða og að það sé ekki fyrir neinu að kvarta. „Við byrjuðum á að reyna við grálúðu hérna fyrir austan en fiskuðum okkur síðan suður eftir. Eftir það vorum við mest á suðvesturmiðum; Selvogsbanka, Skerjadýpi og Fjöllunum. Aflinn var jafn og góður allan túrinn og veðrið var að mestu prýðilegt. Við fengum einn bræludag.“

 Gert er ráð fyrir að Blængur haldi til veiða á ný síðdegis á morgun.

spot_img
spot_img
spot_img

Innlendar Fréttir