1 C
Grindavik
28. nóvember, 2020

Ágætar veiðar togaranna hófust á ýsukroppi

Skyldulesning

Gullver kom til Seyðisfjarðar með fullfermi.

Gullver kom til Seyðisfjarðar með fullfermi.

Ljósmynd/Ómar Bogason

„Við byrjuðum á Glettinganesflakinu í ýsukroppi en fengum síðan þorsk suður á Litladýpi og á Breiðdalsgrunni. Túrinn tók um þrjá og hálfan sólarhring. Það var góður þorskafli þarna suður frá en þegar við fórum hafði veiðin dottið niður,“ er haft eftir Þórhalli Jónssyni, skipstjóra á Gullveri, á vef Síldarvinnslunnar.

Tilefni ummælana er ágæt veiði ísfisktogaranna austur af landinu og kom Gullver Ns til hafnar á Seyðisfirði með fullfermi í morgun, en til Neskaupstaðar kom Bergey VE í gær og Vestmannaey VE í dag.

„Það munaði miklu að við fengum gott veður í túrnum, það var einungis smá kaldi eina nóttina en annars fínt veður,“segir Þórhallur.

Egill Guðni Guðnason, stýrimaður á Vestmannaey, kveðst ánægður með aflabrögðin. „Við fengum þennan afla á Glettinganesgrunni og síðan á Breiðdalsgrunni og út í Hvalbakshalli. Þetta er mest þorskur en einnig dálítið af ýsu. Það kom gott skot í Hvalbakshallinu og þar var mokveiði í tæpan sólarhring. Þetta var hinn þægilegasti túr miðað við veðravítið í síðasta túr.“

Innlendar Fréttir