200 mílur | Morgunblaðið | 16.3.2023 | 9:27
Íslensk fiskiskip hafa landað meira en 14 þúsund tonnum umfram útgefnar veiðiheimildir í gullkarfa síðastliðin þrjú fiskveiðiár vegna tegundatilfærslna. Jón á Hofi, sem Rammi gerir út, er eitt fjölmargra skipa sem stunda gullkarfaveiðar. Ljósmynd/Vigfús Markússon
Ekki liggur fyrir hver áhrif samþykkt frumvarps Svandísar Svavarsdóttur matvælaráðherra um afnám tegundatilfærslu í deilistofnum botnfisks verða á gullkarfa- og grálúðuveiðar íslenskra útgerða, að því er fram kemur í svari Matvælaráðuneytisins við fyrirspurn Morgunblaðsins.
Alls hafa 28 útgerðir síðustu þrjú fiskveiðiár farið með heimildir fyrir 100 tonnum eða meira í tegundunum í gegnum úthlutun eða tegundatilfærslu, en umframveiði þeirra varð til þess að Grænlendingar riftu fiskveiðisamningi við Íslendinga síðastliðið sumar.
Svandís mælti fyrir frumvarpinu á Alþingi 9. febrúar síðastliðinn og er það nú hjá atvinnuveganefnd. Markmið frumvarpsins er að tryggja að veiðar á gullkarfa og grálúðu séu í samræmi við útgefið aflamark og vísindaráðgjöf og þannig draga úr ofveiði þessara stofna.
Þar sem ekki liggur fyrir samningur við Grænlendinga um veiðarnar treystir Matvælaráðuneytið sér ekki til að fullyrða um hver áhrifin verða á veiðar íslenskra skipa.
Nánar er fjallað um málið í Morgunblaðinu í dag.
