2 C
Grindavik
17. janúar, 2021

Alþingi: Tvö stór framtíðarmál koma fram

Skyldulesning

Miðvikudagur, 2. desember 2020

Þótt nánast allar samfélagsumræður snúist um veiruna eru nú komin fram tvö stór mál á Alþingi, sem munu hafa mikil áhrif til langrar framtíðar.

Annað er frumvarp Ásmundar Einars Daðasonar, félags- og barnamálaráðherra, um snemmtæka íhlutun í málefni barna og frumvörp því tengd. Í því felast mestu umbætur, sem ráðist hefur verið í í félagslegum málefnum á Íslandi áratugum saman. Áhrif þess munu smátt og smátt koma fram, þegar líður á þessa öld.

Hitt er frumvarp Guðmundar Inga Guðbrandssonar, umhverfis- og auðlindaráðherra um miðhálendisþjóðgarð, sem snýst um varðveizlu íslenzkrar náttúru og að núlifandi kynslóðir Íslendinga skili landinu og náttúru þess í hendur nýrra kynslóða framtíðarinnar á þann veg sem hæfir.

Víðtæk pólitísk samstaða er um barnafrumvarp Ásmundar Einars. Samkvæmt fréttum hafa þingmenn meiri fyrirvara á hálendisfrumvarpi Guðmundar Inga. Þeir fyrirvarar eru á misskilningi byggðir. Þjóðgarður á hálendinu er sambærileg ráðstöfun og friðunaraðgerðir á fiskimiðunum við Ísland. Í báðum tilvikum er verið að varðveita mikilvægustu auðlindir þjóðarinnar á þann veg, að afrakstur þeirra tryggi búsetu í þessu landi um langa framtíð. 

Hálendisþjóðgarður mun skila þjóðinni miklum tekjum til framtíðar ekki síður en fiskimiðin.

Þingmenn, sem hafa einhverjar efasemdir ættu að fylgjast með ráðstefnu Landverndar í gær um þjóðgarðinn, sem sjálfsagt verður aðgengileg á heimasíðu Landverndar.

Innlendar Fréttir