2 C
Grindavik
7. maí, 2021

Arnar Þór eftir tapið gegn Armeníu: „Verðum að vilja gera betur“

Skyldulesning

Arnar Þór Viðarsson, hefur stýrt íslenska karlalandsliðinu í tveimur leikjum, báðir í undankeppni HM.

Íslenska liðið tapaði í dag 2-0 fyrir Armeníu á útivelli.

„Þetta var leikur sem var að mínu mati alltaf að fara falla fyrir það lið sem myndi ná að skapa sér eitthvað færi eða skora fyrsta markið,“ sagði Arnar Þór Viðarsson, landsliðsþjálfari í viðtali við RÚV eftir leik.

Túlka má á orðum Arnars að Armenarnir hafi verið sýnd veiði en ekki gefin.

„Þetta var bara lokaður leikur, við vissum það fyrir fram að þetta lið er mjög aðgangshart og leikmennirnir eru mjög viljugir í sínum hlaupum.“

„Við töluðum um það fyrir leikinn að þeir eru með mikið sjálfstraust, hafa unnið marga leiki undanfarið og hafa verið að spila vel.“

Ísland er eftir tap dagsins í neðsta sæti riðilsins án stiga eftir tvær umferðir, hvernig metur Arnar stöðu liðsins?

„Við erum í þessum glugga að spila þrjá útileiki. Við vissum alltaf að fyrstu tveir leikirnir yrðu mjög erfiðir. Við munum þó ekki vanmeta neinn fyrir síðasta leikinn í glugganum,“ sagði Arnar Þór Viðarsson, landsliðsþjálfari í viðtali við RÚV eftir leik.

Arnar var spurður út í landsliðsvalið og þá staðreynd að inn á séu leikmenn sem séu komnir nálægt endapunkti síns knattspyrnuferils á meðan leikmenn eins og Alfons Sampsted og Hjörtur Hermannsson, sitja á bekknum.

„Ég er að stilla upp því liði sem ég tel að eigi besta möguleikann á að vinna hvern leik fyrir sig akkúrat núna. Ég er ekki að hugsa um það núna hvað mun gerast í haust eða í sumar.“

„Staðan er sú að núna í dag voru þetta að mínu mati bestu ellefu einstaklingarnir til þess að mynda liðsheild og mynda það spil sem við vildum ná upp í dag.“

„Við gerum okkur alveg grein fyrir því að við þurfum að gera betur og við þurfum að skapa okkur fleiri færi og ná upp hungri aftur í að ná úrslitum.“

Leikmennirnir og liðið sem spilar hér í kvöld hefur mikla hæfileika og hefur sýnt það undanfarin ár að það getur náð mjög góðum úrslitum á mjög erfiðum útivöllum gegn mjög góðum liðum,“ sagði Arnar Þór Viðarsson, landsliðsþjálfari í viðtali við RÚV eftir leik.

En veikir þetta möguleika Íslands á að komast á HM í Katar árið 2022?

„Að sjálfsögðu veikir þetta möguleika okkar. Til þess að ná 2. sætinu má reikna með því að þú getir tapað tveimur útileikjum og þá þarftu að ná mjög góðum úrslitum á heimavelli. Ég held samt að þessi riðill muni spilast aðeins öðruvísi en margir halda, þetta er mjög jafn riðill.“

„Það eina sem við þurfum að gera núna er að leikgreina þennan leik og gera okkur grein fyrir því að þetta var ekki nógu gott, við getum gert betur og við verðum að vilja gera betur,“ sagði Arnar Þór Viðarsson, landsliðsþjálfari í viðtali við RÚV eftir leik.

Næsti leikur Íslands er gegn Liechtenstein á miðvikudaginn.

spot_img
spot_img
spot_img

Innlendar Fréttir