Átti að nota fimmtu flugvélina í hryðjuverkaárásunum á Bandaríkin 2001? – DV

0
110

Flugstjóri vélar frá United Airlines, sem átti að taka á loft frá JFK flugvellinum í New York, að morgni 11. september 2001, telur að flugvél hans hafi átt að vera fimmta flugvélin í áætlun hryðjuverkamanna um árásina sem var gerð á Bandaríkin þennan dag. Tom Mannello, flugstjóri, sat í flugstjórnarklefanumum klukkan 9 að morgni og beið eftri að fá heimild til flugtaks. Þá fyrirskipuðu flugumferðarstjórar öllum flugvélum að fara aftur að landgöngunum.

Síðar komst Mannello að því að í flugvél, sem var við næsta landgang, hafi fundist hnífur. Hann telur að starfsmenn á vellinum hafi aðstoðað hryðjuverkamennina en hafi ruglast á flugvél og sett hnífinn í ranga vél. Þannig hafi verið komið í veg fyrir að vél hans væri notuð til hryðjuverks.

„Það eru miklar líkur á að einhver hafi haft í hyggju að nota vélina okkar sem gjöreyðingarvopn,“ segir hann í þættinum TMZ INVESTIGATES: 9/11: THE FIFTH PLANE, sem verður sendur út í kvöld á Fox.

Flug Mannello, United 23, er ekki nefnt í skýrslu rannsóknarnefndarinnar, sem rannsakaði hryðjuverkin, og enginn úr vélinni var handtekinn.

Bandarískir embættismenn hafa ekki viljað tjá sig um þessar vangaveltur.

Árásirnar á Bandaríkin þann 11. september 2001 eru mannskæðustu hryðjuverkaárásirnar í sögu landsins. 2.977 manns létust í fjórum aðskildum árásum. Fjórar flugvélar hröpuðu þennan morgun.