bandamadur-putins-segir-ad-markmid-hans-se-ad-„mynda-opna-evrasiu-fra-lissabon-til-vladivostok“

Bandamaður Pútíns segir að markmið hans sé að „mynda opna Evrasíu frá Lissabon til Vladivostok“

Einn nánasti bandamaður Vladímír Pútíns, Rússlandsforseta, er Dmitri Medvedev sem gegnir nú embætti varaformanns rússneska öryggisráðsins. Hann var áður forsætisráðherra og forseti í eitt kjörtímabil þegar Pútín gat ekki boðið sig fram til embættis vegna ákvæðis í stjórnarskránni sem takmarkaði fjölda kjörtímabila sem sami aðili mátti gegna embætti forseta.

Medvedev birti löng skilaboð á Telegram í gær þar sem hann gaf til kynna að markmiðunum með innrásinni í Úkraínu verði ekki náð „á einni nóttu“. Hann sagði einnig að eitt af markmiðum Rússa með innrásinni sé að mynda „opna Evrasíu, frá Lissabon til Vladivostok“ og vísar þar til Lissabon í Portúgal, í vestri og Vladivostok í austri, nærri Kína og Norður-Kóreu.

Medvedev sagði að Rússar muni ekki ná þeim markmiðum sínum að „afnasistavæða og gera Úkraínu hernaðarlega óvirka“ á „einni nóttu“ og að „þetta verði ekki eingöngu leyst á vígvellinum“. Hann sagði að stóra áætlunin væri að skapa frið fyrir komandi kynslóðir Úkraínumanna og að geta loksins myndað opna Evrasíu frá Lissabon til Vladivostok.

Að öðru leyti snerust skilaboð hans að mestu um að neita ásökunum úkraínsku stjórnarinnar um ódæðisverk Rússa í Bucha þar sem mörg hundruð manns voru tekin af lífi af hersveitum Rússa.

Hann hélt uppteknum hætti rússneskra ráðamanna hvað varðar orðfæri og hugmyndafræði og sagði að Úkraínumenn hafi dreymt um Þriðja ríkið síðustu 30 ár og það bókstaflega. Hann sagði að myndir, sem finnast hjá næstum hverri einustu úkraínsku hersveit, fylli fólk hryllingi en þær sýni merki nasista, fána nasista, bókmenntir þeirra og veggspjöld og jafnvel drykkjarkönnurnar séu með hakakrossi.


Posted

in

,

by

Tags: