Banvæn sveppasýking dreifir sér – „Þetta er allt öðruvísi en COVID-19“ – DV

0
143

Bandarísk yfirvöld hafa sent út viðvörun vegna aukinnar útbreiðslu banvænnar sveppasýkingar. Þetta er Candida auris sem breiðist „mjög hratt“ út í Bandaríkjunum að sögn þarlendra heilbrigðisyfirvalda. Ekki bætir úr skák að sveppasýkingar af þessu tagi byggja upp sífellt meiri mótstöðu gegn sýklalyfjum. Fimm tilfelli hafa greinst í Danmörku en þrátt fyrir það er engin ástæða til að örvænta að sögn Maiken Cavlind Arendrup, yfirlæknis hjá dönsku smitsjúkdómastofnuninni og yfirmanns svepparannsóknardeildar stofnunarinnar.

Í samtali við TV2 sagði hún að fólk þurfi ekki að vera hrætt því þetta séu ekki örverur sem leggjast á heilbrigt fólk. „Þess vegna er þetta allt öðruvísi en COVID-19,“ sagði hún og bætti við: „En þetta er sveppur sem við verðum að fylgjast mjög vel með því ef heil sjúkrahúsdeild er sýkt, þá er erfitt að losna við hann.“

Hún sagði að sveppurinn hafi aðallega valdið vanda í Evrópríkjum á borð við Spán, Ítalíu og Grikkland þar sem sé glímt við vandamál vegna sýklalyfjaónæmis. Það hafi verið vandamál á sjúkrahúsum þar sem virðist sem hreinlæti sé ekki nægilega gott.

Bandaríska smitsjúkdómastofnunin, CDC, sagði nýlega í fréttatilkynningu að yfirvöld muni nú vinna með yfirvöldum einstakra ríkja og heilbrigðisyfirvöldum einstakra ríkja við að takast á við „þessa nýju ógn gegn lýðheilsu“.

Smitum af völdum Candida auris hefur fjölgað mikið í Bandaríkjunum á aðeins tveimur árum en þau þrefölduðust á þeim tíma. 2021 voru þau 1.471.