Besta deild karla: Ótrúleg dramatík í Árbænum – Grátlegt fyrir Framara – DV

0
173

Það fór fram ótrúlegur fótboltaleikur í Bestu deild karla í kvöld þegar Breiðablik og Fram mættust.

Leikurinn fór fram á Wurth-vellinum í Árbæ. Verið er að skipta um gervigras á heimavelli Blika og því ekki hægt að spila þar.

Breiðablik réði lögum og lofum fyrsta hálftíma leiksins. Stefán Ingi Sigurðarson kom þeim yfir strax á 4. mínútu með flottum skalla eftir frábæra sendingu Gísla Eyjólfssonar.

Patrik Johannesen tvöfaldaði forystu Blika 20 mínútum síðar með marki úr vítateignum eftir flotta sókn. Skömmu síðar skoraði Stefán sitt annað mark. Staðan 3-0 og forskot Íslandsmeistaranna síst of stórt.

Skömmu fyrir hálfleik minnkaði Fram hins vegar muninn. Markið skoraði Guðmundur Magnússon eftir flotta sendingu Fred og gestirnir skyndilega komnir inn í leikinn.

Framarar komu mun sterkari inn í seinni hálfleik og skoruðu strax á 52. mínútu þegar Már Ægisson kom knettinum í netið.

Stefán Ingi skoraði hins vegar hinum megin strax í kjölfarið. Fullkomnaði þrennuna og kom Blikum í 4-2.

Framarar voru hins vegar hvergi nærri hættir. Fred minnkaði muninn í eitt mark á ný eftir rúman klukkutíma leik.

Á næstu mínútum virtust Blikar líklegri til að bæta við en Magnús Þórðarson jafnðai fyrir Framara eftir skyndisókn á 76. mínútu. Staðan orðin 4-4 í mögnuðum leik.

Það leit út fyrir að leikurinn væri að fjara út þegar Blikar fengu hornspyrnu á sjöttu mínútu uppbótartíma. Klæmint Olsen stangaði boltann í netið eftir hana og tryggði Íslandsmeisturunum 5-4 sigur.

Úrslitin þýða að Breiðablik er í öðru sæti deildarinnar með 6 stig eftir fjóra leiki. Fram er á botninum með 2 stig.