-2 C
Grindavik
24. janúar, 2021

Bílar sátu fastir í Baldri

Skyldulesning

Á myndinni má sjá þegar vörubílarnir sátu fastir í ferjunni.

Ljósmynd/Hrönn Árnadóttir

Breiðafjarðarferjan Baldur sat föst í tvær klukkustundir í höfninni í Stykkishólmi fyrr í dag. Vegna þess að háfjara var um það leyti sem ferjan lagðist að bryggju um þrjúleytið komust þungir vörubílarnir um borð ekki út vegna mikils bratta.

Að sögn Matthíasar Þorgrímssonar, skipstjóra Baldurs, voru vörubílarnir farnir að rekast niður að aftan vegna brattans. Vörubílarnir, sem voru sex talsins, ætluðu að flytja eldislax til Þorlákshafnar og býst Matthías við því að þeir nái ferðinni með skipi þar klukkan tíu í kvöld.

Skipstjórinn segir þetta gerast af og til en eingöngu þegar það hittir svona á í kringum háfjöru. Fólksbílar voru fyrir aftan vörubílana í skipinu og komust þeir því ekki heldur út fyrir en um fimmleytið þegar aðstæður bötnuðu, en Rúv greindi fyrst frá málinu. 

Hrönn Árnadóttir frá Patreksfirði er ein þeirra sem þurftu að bíða lengi eftir því að komast af stað með ferjunni frá Stykkishólmi. „Þetta er mjög slæm staða,“ segir hún og er ósátt við að háfjara verði til þess að vandamál skapist. „Vegirnir eru búnir að vera lokaðir og það er hrikalegt að fara hérna á milli,“ bætir hún við en færðin á vegum hefur verið slæm. 

Innlendar Fréttir