Skipverjinn var hífður um borð í þyrlu LAndhelgisgæslunnar. Mynd úr safni. Ljósmynd/Landhelgisgæslan
Þyrla Landhelgisgæslunnar var kölluð út í nótt vegna veikinda 84 ára manns sem var einn um borð í strandveiðibáti út af Sandgerði. Björgunarskipið Stefnir frá Slysavarnarfélaginu Landsbjörg og varðskipið Þór voru einnig kölluð út, auk þess sem Páll Jónsson GK var staddur fimm sjómílur frá og beðinn um að halda á staðinn.
Þetta staðfestir Ásgeir Erlendsson, upplýsingafulltrúi Landhelgisgæslunnar, í svari við fyrirspurn. Hann segir stjórnstöð Landhelgisgæslunnar hafi borist tilkynning um veikindi um borð í fiskibát á strandveiðum vestur af Sandgerði laust eftir miðnætti.
Þegar þyrla mætti á svæðið var skipverjinn hífður um borð í þyrlu Landhelgisgæslunnar og komið undir læknishendur í Reykjavík. „Sigmaður þyrlunnar varð eftir í bátnum og sigldi honum til Sandgerðis í fylgd Stefnis. Á sjöunda tímanum í morgun var fiskibáturinn kominn til Sandgerðis,“ segir Ásgeir.
