5 C
Grindavik
7. mars, 2021

Covid tíminn yndislegur þrátt fyrir erfiðleika

Skyldulesning

Rannveig Grétarsdóttir framkvæmdastjóri Eldingar er gestur kaffispjallsins þessa helgina.

Rannveig Grétarsdóttir framkvæmdastjóri ferðaþjónustufyrirtæksins Eldingar, ákvað strax að nýta vel Covid tímann sem hún segir hafa verið mjög góðan fyrir sitt persónulega líf. Staðan í ferðaþjónustunni er erfið en hún er bjartsýn fyrir framtíðina. Rannveig er háð veðurfréttum af gömlum vana og á erfitt með að halda sig frá ömmubörnunum.

Í kaffispjalli um helgar er rætt við fólk í ólíkum störfum. Við spyrjum alltaf hvenær fólk vaknar, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefni.

Hvenær vaknar þú á morgnana?

„Flesta morgna er ég vöknuð rétt fyrir sjö mér, finnst samt gott að snúsa aðeins og hef því klukkuna alltaf stillta hálf átta til að vera örugg ef ég skyldi sofna aftur, sem gerist samt ekki oft.“

Hvað er það fyrsta sem þú gerir á morgnana?

,,Morgnarnir eru mínar gæðastundir! Tek því rólega, hlusta á góða músík, gott hlaðvarp og eða læt einhverja útvarpsrásina rúlla á meðan ég er að taka mig til fyrir daginn.

Ég er snúsari, og kúri gjarnan undir sænginni á meðan ég kíki á veðrið að gömlum vana sem er mikilvægur þáttur í starfseminni hjá okkur, skima yfir fréttamiðlana og tek stöðuna á samfélagsmiðlunum.

Ég er svo heppin að búa á 9. hæð og sé yfir sundin blá og byrjað því auðvita alltaf daginn líka á því að líta til veðurs og sjólags.

Ég er ferleg þegar kemur að morgunmatnum og sleppi honum iðulega og hef aldrei drukkið kaffi. Er samt að reyna að taka mig á!“

Hvernig hefur Covid tímabilið nýst þér persónulega, sbr. algjört hlé í ferðaþjónustu?

Covid hefur í raun verið gott fyrir persónulega líf mitt, ég hef aldrei haft eins mikinn tíma fyrir sjálfa mig og ég ákvað strax að ég ætlaði að nýta tímann. Ég hef því verið að fara út fyrir þægindahringinn, njóta og upplifa og hef verið að gera hrikalega skemmtilega hluti sem ég annars hefði sennilega aldrei gert! Sökum anna.

Ég tók uppá því að hjóla hringinn í kringum landið í sumar á rafmagnshjóli og rafmagnshoppuhjóli með vinkonum mínum og vorum við í beinni útsendingu í nokkra tíma á daga alla dagana á samfélagsmiðlum. Sem var algjörlega útúr boxinu mínu en vandist ótrúlega.

Þá fór ég í þó nokkrar göngur meðal annars á Hornstrandir og fleiri skemmtileg ferðalög innanlands sem og heimsóknir með og til vina víðsvegar um landið.

Í vetur hlakka ég til að komast aftur á skíði ég hef hingað til aðeins verið á svigskíðum en er núna búin að skrá mig bæði á fjallaskíða- og gönguskíðanámskeið eftir áramótin.

Þá er ég svo lánsöm að eiga tvær dætur og fjórar litlar ömmustelpur svo ég reyni að vera eins mikið með þeim og ég get.

Sú nýjasta fæddist fyrir nokkrum dögum á Akureyri og hef ég því síðustu vikurnar verið að þvælast á milli Reykjavikur og Akureyrar. En þar býr yngri dóttir mín sem var að verða mamma í fyrsta sinn og erfitt fyrir mig að halda mér frá þeim.“

Rannveig ákvað strax að nýta tímann vel í Covid þótt staðan sé erfið hjá ferðaþjónustunni og atvinnurekendur.Vísir/Vilhelm

Í hvaða verkefni ertu að vinna helst í þessa dagana?

„Vegna stöðunnar í ferðaþjónustunni þá eru verkefnin mín mjög frábrugðin því sem þau hafa verið síðustu 20 árin í rekstri Eldingar. Nú eru aðeins örfáir starfsmenn eftir í tilfallandi starfi hjá Eldingu aðalega til að passa uppá að bátarnir haldist á floti og bundnir við bryggju.

Svo verkefnin mín núna snúast aðalega um fjármálin og gera það besta úr erfiðri stöðu.

Það eru mörg verkefni sem bíða á borðinu mínu sem snúa að því að vera tilbúin í viðspyrnuna en miðað við hvernig frumvarp um viðspyrjustyrki lítur út í dag þá munu fyrirtæki í 100% tekjufalli eins og er hjá okkar fyrirtæki og mörgum öðrum fyrirtækjum í ferðaþjónustu, ekki getað nýtt sér þá styrki. Svo það lítur því miður út fyrir að það verði engin starfsemi næstu mánuðina og áfram bið eftir að löndin opnist og fólk fari að ferðast aftur.

Ég er aftur á móti mjög bjartsýn og held að ferðaþjónustan muni vaxa hraðar en við þorum að vona og því skiptir máli að við verðum öll tilbúin þegar allt opnast. En þetta ár hefur kennt okkur öllum mjög margt og má segja að þetta sé skóli sem enginn vildi fara í en allir eru að læra mjög mikið af og mun slá ákveðinn takt til framtíðar.“

Hvernig skipuleggur þú þig í vinnu?

„Ég er alltaf með marga bolta á lofti í einu. Ég vil meina að ég sé aðeins óskipulögð en alltaf með yfirsýn. Ég er mjög vinnusöm og næ því vanalega að komast í gegnum verkefni mín í tíma. Ég á það þó til að vinna í skorpum taka langa daga en svo leyfi ég mér á móti að slá slöku við og hitta vini mína í löngum hádegimat eða á kaffihúsi, vera með barnabörnin mín eða fara í göngu eða aðra hreyfingu þegar færi gefst.“

Hvenær ferðu að sofa á kvöldin? 

„Ég er ein af þeim heppnu sem sofna vanalega um leið og ég leggst á koddann og ég reyni vera komin uppí rúm fyrir miðnætt til að ná allavega sjö klukkustunda svefn.“


Tengdar fréttir


Helgi Jóhannsson klæðist alltof stórum joggingbuxum þegar hann fer út að ganga með hundana á morgnana. Þessar buxur segir hann vera slysakaup á netinu. Helgi er gestur kaffispjallsins að þessu sinni.


Rósa Guðný Þórsdóttir leikkona og leikstjóri er gestur kaffispjallsins þessa helgina. Hún viðurkennir að vera stundum morgunfúl en dreymir um að vakna eldhress á morgnana og dansa fram í eldhús.


Þorsteinn Víglundsson segir þrjá espresso þurfa alla morgna til að rífa sig í gang. Honum leiðist tímasóun og segir hana of mikla á þingi. Að sitja á þingi sé þó mikill heiður. Í forstjórastarfinu í dag eru það hins vegar umhverfismálin sem eru hvað brýnust.


Thelma Kristín Kvaran er gestur kaffispjallsins þessa helgina. Hún segist vera mikil hundakona, viðurkennir að skipulagið hjá sér er skipulagt chaos og brennur fyrir jafnréttismálum.


Árni Stefánsson forstjóri Húsasmiðjunnar er gestur kaffispjallsins þessa helgina. Hann segir umdeilanlegt hversu handlaginn hann er heima fyrir en viðurkennir að vera mikill tækjakarl sem reddar sér með gúggli.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.


Fleiri fréttir

Sjá meira

Innlendar Fréttir