-1 C
Grindavik
21. janúar, 2021

Deilt um síma sem gæti innihaldið viðkvæma nektarmynd

Skyldulesning

Landsréttur staðfesti í gær úrskurð héraðsdóms í máli sem snertir dreifingu nektarmyndar af konu í sturtu.

Ákæruvaldið taldi rökstuddan grun leika á því að kona og maður hefðu undir höndum á símtækjum sínum nektarmynd af konu í sturtu en myndinni hafði verið dreift í lokuðum Facebook-hópi. Málið er reifað svona í úrskurði Landsréttar:

„Aðspurður um hvar hann hefði fengið umrædda nektarmynd sagði Y að myndin hefði komið til hans í gegnum Facebook-hópinn. Hann sagðist ekki muna hver hefði sett myndina inn á Facebook-hópinn en tók fram að það „stæði í grúppunni.“ Í skýrslu varnaraðila hjá lögreglu mun varnaraðili hafa viðurkennt að vera hluti af framangreindum Facebook-hóp, en sagt að hún myndi ekki eftir umræddri nektarmynd. Hafi hún boðist til þess að opna spjallið til þess að sýna lögreglu, en henni var jafnframt kynnt að lögreglan væri búin að skoða spjallið. Hún kvaðst ekki heimila lögreglu leit og skoðun á síma sínum án dómsúrskurðar.“

Maðurinn viðurkenndi að hafa haft undir höndum nektarmynd af konunni og sýnt hana félögum sínum ásamt myndum af fleiri nöktum konum. Framburður hans gaf til kynna að áðurnefnd kona gæti hafa birt myndina upphaflega. Lögregla fékk heimild til að rannsaka snjallsíma mannsins og skoðaði meðal annars öll Facebook-samskipti hans. Krafist var heimildar til að rannsaka síma konunnar. Hún varð ekki við þeirri beiðni og héraðsdómur hafnaði kröfunni.

Landsréttur staðfesti í gær úrskurð héraðsdóms í málinu og fær lögreglan því ekki að rannsaka síma konunnar. Telja dómstólarnir lögregluna ekki hafa fært nægileg rök fyrir því að nauðsynlegt sé að skoða símann og er meðal annars vísað til þess að rannsókn á síma mannsins og Facebook-samskiptum hans ætti að duga til að afla þeirra upplýsinga sem þörf er á við rannsóknina.

Sjá úrskurði Landsréttar og héraðsdóms

Innlendar Fréttir