„Ég var nú að vonast til að þetta yrði eitthvað meira en tvö ár“ – Vísir

0
158

„Ég var nú að vonast til að þetta yrði eitthvað meira en tvö ár“ Guðmundur Felix Grétarsson segist bjartsýnn á að lyfjameðferð geti unnið gegn bakslagi sem er komið í ágrædda handleggi hans. Guðmundur fór að finna fyrir einkennum höfnunar fyrir tveimur vikum.

Þetta er ekki fyrsta í fyrsta sinn sem líkami Guðmundar Felix hafnar handleggjunum og eru það að hans sögn viðbúin viðbrögð. Guðmundur Felix segir þó óalgengt að fá einkenni höfnunar tveimur árum eftir ágræðslu. Hann fór að finna fyrir fyrstu einkennum höfnunar fyrir rúmum tveimur vikum þegar bólgur fóru að myndast í kringum neglurnar. 

„Svo byrjaði að blæða úr öllu og ég er byrjaður að missa neglurnar“

Hann hafi fengið lyf í kjölfarið en þau hafi ekki virkað sem skyldi og fór Guðmundur að taka eftir rauðum flekkjum á húðinni. 

Brjáluð höfnun í gangi „Það getur alltaf komið svona aðeins en svo fór það að á gerast og á miðvikudagsmorgun tek ég myndir af þessu og sendi á teymið og var þá kallaður beint niður á spítala og það var tekið sýni. En þetta var þannig að það var ekkert verið að bíða eftir niðurstöðum. Þeir sögðu það er bara höfnun í gangi alveg brjáluð sko,“ segir Guðmundur sem var þá settur á stóra steraskammta. 

Sjá má viðtalið við Guðmund Felix í spilaranum að neðan. 

Að sögn Guðmundar er þetta í þriðja sinn sem líkaminn hafnar höndunum. Það sé eðlilegt á fyrsta árinu eftir aðgerð en ekki eins algengt tveimur árum eftir ágræsðlu líkt og nú. Guðmundur var að klára sterameðferð og fer síðan aftur á sín lyf nema í hærri skömmtun næsta mánuðinn. Framhaldið þurfi svo að koma í ljós. Hann segist þó ekki hræddur um að missa hendurnar á þessum tímapunkti þó það sé vissulega möguleiki. Dæmi séu um tilfelli þar sem fólk hafi fengið handaágræðslur og misst þær. 

Bjartsýnn á að halda höndunum „Það er svona smá huggun í harmi að í þeim tilfellum sem það hefur gerst hefur það yfirleitt verið tengt við vanrækslu. Fólk er ekki að taka lyfin sem það á að taka, þú þarft að taka lyf á tólf tíma fresti til að hafna þessu ekki, ekki reykja. Ef að svona lagað kemur upp á að það sé dílað við það strax. Í þeim tilfellum sem fólk hefur misst útlimi þá hefur eitthvað af þessu ekki verið í lagi,“ segir Guðmundur.  

„Það er alltaf þessi möguleiki, við höfum vitað það frá upphafi. Það er ekkert víst að þetta sé for life time sko en ég var nú að vonast til að þetta yrði eitthvað meira en tvö ár“

Guðmundur er bjartsýnn á að lyfjagjöfin virki og að hann haldi höndunum. Honum líði vel þrátt fyrir ýmsa kvilla tengdum bakslaginu og lyfjagjöfinni. „Ég er ekkert kominn í einhverjar þráhyggju hugsanir með eitthvað vonleysi. Ég hef fulla trú á að þetta fari allt vel,“ segir hann. Framhaldið skýrist betur um miðjan maí. 

„Ég vil nota tækifærið og þakka fyrir stuðninginn. Búinn að fá mörg hundruð skilaboð. Það er æðislegt að finna alltaf hvað maður hefur mikinn stuðning hérna að heiman,“ segir Guðmundur að lokum. 

Tengdar fréttir Guð­mundur Felix hjólaði í fyrsta sinn í 25 ár Guðmundur Felix Grétarsson hjólaði nýverið í fyrsta sinn eftir að hafa misst báða handleggi sína í slysi árið 1998. Hann stefnir á að geta hjólað til og frá spítala í Frakklandi þar sem hann býr.

20. apríl 2023 08:44

Guðmundur Felix með aðra hönd á stýri Guðmundur Felix Grétarsson er byrjaður að æfa sig að keyra með hægri hendinni. Síðan um aldamótin hefur hann eingöngu getað keyrt með fótstýri. Nú sér hann fram á að geta loksins keypt sér nýrri bíl.

19. febrúar 2023 12:51

Guð­mundur Felix fagnar tveggja ára af­mæli Guðmundur Felix Grétarsson fagnar því að tvö ár séu liðin frá því að hann fékk ágræddar hendur. Frönsk sjónvarpsstöð tók hús á honum í dag.

13. janúar 2023 21:36

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið
Fleiri fréttir Sjá meira