1 C
Grindavik
18. janúar, 2021

Eiður Smári gat ekki sleppt tækifærinu – „Þegar við erum ósammála þá hækka ég yfirleitt róminn“

Skyldulesning

„Ég vil þakka FH-ingum fyrir frábært tækifæri í sumar, ég átti frábæran en stuttan tíma þar. Það er gott að allir gátu komist sáttir frá borði, hjálpað mér að fá þetta tækifæri. Ég gat ekki sleppt þessu tækifæri, mikil áskorun en skemmtileg,“ sagði Eiður Smári Guðjohnsen nýr aðstoðarlandsliðsþjálfari karla.

Eiður Smári lét af störfum sem þjálfari FH á sama tímapunkti en hann taldi sig ekki getað sleppt tækifærinu þegar KSÍ bauð honum starf.

Eiður mun vinna með Arnari Þór Viðarssyni en þeir unnu saman með U21 árs landsliðinu og komu liðinu inn á EM. „Það er skipt til helminga hvernig við vinnum, ég er aðstoðarmaður Arnars og hann aðstoðarmaður minn. Þetta snýst allt um að liðið spili á sinni bestu getu og við náum úrslitum.“

Eiður er markahæsti leikmaður í sögu Íslands ásamt Kolbeini Sigþórssyni. „Núna erum við að fara að þjálfa karlmenn, sumir í U21 voru strákar. Það er tilhlökkun í þeim efnum.“

Eiður og Arnar Þór léku lengi vel saman í landsliðinu og voru herbergisfélagar í mörg ár. „Við eigum einstakt samband, bæði innan sem utan vallar og á hliðarlínunni. Það er fátt sem ég sé koma upp sem gæti slitið því sambandi, þegar við erum ósammála þá hækka ég yfirleitt róminn og Arnar tekur undir það.“

Eiður lék lengi vel með þeim leikmönnum sem nú eru til taks í hópnum, það er ekki áhyggjuefni. „Þetta snýst ekki um að vera vinur þeirra og þekkja þá rosalega vel. Það er gott að sjá hvernig þeim líður inni á vellinum. Við búum til ramma sem þjálfarar og leikmenn fara eftir, þeirra hlutverk er að mynda sína stemmingu og hópa, burtséð frá okkur.“

Innlendar Fréttir