3 C
Grindavik
1. mars, 2021

Einar ráðinn framkvæmdastjóri Hábrúnar

Skyldulesning

Einar Guðmundsson er nýr framkvæmdastjóri Hábrúnar.

Ljósmynd/Aðsend

Einar Guðmundsson hefur verið ráðinn framkvæmdastjóri fiskeldisfyrirtækisins Hábrúnar hf. sem starfrækir regnbogaeldi í Skutulsfirði og fiskvinnslu í Hnífsdal. Fyrirtækið er eitt elsta starfandi sjókvíaeldisfyrirtæki á Íslandi með nærri tveggja áratuga reynslu af eldi við Ísafjarðardjúp. Þetta kemur fram í tilkynningu.

Einar er fertugur að aldri, fæddur og uppalinn í Bolungarvík og útskrifaðist nýlega sem viðskiptafræðingur frá Háskólanum á Bifröst. Hann hefur starfað sem skipstjóri síðustu tíu ár ásamt því að reka útgerð með fjölskyldu sinni.

Þá situr Einar í stjórn Fiskmarkaðs Vestjarða og var formaður hafnarstjórnar Bolungarvíkur í fjögur ár. Hann hefur víðtæka þekkingu á rekstri fyrirtækja í sjávarútvegi og passar einkar vel inn í starfsmannahóp Hábrúnar sem sér fram á meiri vöxt fyrirtækisins innan fárra ára.

Aðrir lykilstarfsmenn Hábrúnar eru Davíð Kjartansson rekstrarstjóri, Jóhanna Ósk Halldórsdóttir sölustjóri, og Ásgeir Sólbergsson skrifstofustjóri.

Hábrún er með leyfi fyrir 700 tonna eldi af regnbogasilungi en hefur jafnframt sótt um leyfi Skipulagsstofnunar til verulegrar stækkunar til að styrkja stoðir fyrirtækisins enn frekar. Hluthafahópur Hábrúnar samanstendur einkum af heimamönnum og öðrum fjárfestum sem hafa sterk tengsl vestur á firði.

Innlendar Fréttir