3 C
Grindavik
28. febrúar, 2021

Einn hlaut meiðsl er Dala-Rafn rakst á Elliðaey

Skyldulesning

Dala-Rafn skall á Elliðaey á sunnudagskvöld. Einn slasaðist en þó ekki alvarlega. Skipið varð fyrir minniháttar skemmdum á stefni og hélt aftur til sjós.

Ljósmynd/Ísfélagið

Dala-Rafn, skuttogari sem gerður er út af Ísfélagi Vestmannaeyja, varð fyrir því óláni á sunnudagskvöld að skella á Elliðaey með þeim afleiðingum að skemmdir urðu á stefni skipsins og einn handleggsbrotnaði. Þetta staðfestir lögreglan í Vestmannaeyjum.

„Skipið lendir þarna á Elliðaey. […] Það slasaðist einn um borð, ekki alvarlega,“ segir Tryggvi Ólafsson lögreglufulltrúi í samtali við 200 mílur. Hann segir skipið ekki mikið laskað, enda komið á sjó aftur. „Þetta hefði getað farið illa, það er þarna grynning rétt hjá. Það er alltaf slæmt ef menn slasast en sem betur fer slapp þetta með þessum hætti.“

Hann kveðst ekki geta tjáð sig nánar um málsatvik að svo stöddu þar sem enn á eftir að taka skýrslu af nokkrum skipverjum. Rannsóknarnefnd samgönguslysa staðfestir að atvikið hafi verið tilkynnt til nefndarinnar, en nefndin mun ekki gefa út neinar upplýsingar fyrr en skýrsla hennar verður birt.

Elliðaey er rétt norðaustur af Heimaey og er þriðja stærsta eyja Vestmannaeyja. Eyjan er með mikla kletta og er hæsti punktur hennar 114 metrar yfir sjávarmáli. Mikið fuglavarp er í eynni og því mikil fuglatekja stunduð þar.

Eyjar.net sagði fyrst frá atvikinu.

Innlendar Fréttir