Enn mikill hiti í skipinu

0
128

Grímsnes GK-555 lá við bryggju í Njarðvíkurhöfn í morgun þegar eldurinn kom upp. mbl.is/Kristinn Magnússon

Mikill hiti er enn í Grímsnesi GK-555 að sögn Péturs Óla Péturssonar aðstoðarvarðstjóra Brunavarna Suðurnesja. Slökkvilið er enn að störfum við Njarðvíkurhöfn en viðbragðsaðilum barst tilkynning um eldinn laust eftir klukkan tvö í nótt. 

„Það er gríðarlegur hiti í skipinu núna,“ segir Pétur. Spurður hverju aðgerðir slökkviliðs beinist að núna segir Pétur að það sé helst að koma í veg fyrir að mikil mengun fari í höfnina og að hindra að skipið sökkvi eða fari á hliðina. 

„Það er verið að passa upp á að það fari ekki á hliðina. Lóðsbáturinn í Keflavík skorðaði hann fyrir okkur. Hann keyrði hann upp í fjöru fyrir okkur og hann er skorðaður þar,“ segir Pétur. 

Spurður hvaðan hitinn komi segist Pétur ekki vera klár á því, það geti verið svo margt.

„Þetta eru með erfiðustu aðstæðum sem maður lendir í. Útgönguleiðirnar eru takmarkaðar þegar við erum inni,“ segir Pétur. 

Mikill hiti er enn í skipinu og slökkvilið varnar því nú að það sökkvi eða leggist á hliðina. mbl.is/Kristinn Magnússon