5 C
Grindavik
5. mars, 2021

Fellin halda áfram að gera það gott

Skyldulesning

Sandfell á siglingu. Báturinn var aflahæstur í sínum stærðarflokki í fyrra.

mbl.is/Hafþór Hreiðarsson

Hafrafell SU og Sandfell SU halda áfram að gera það gott og var Sandfellið aflahæsti línubátur landsins af sinni stærð árið 2020 og kom með 2.300 tonn að landi, en báturinn hefur verið aflahæstur frá því að Loðnuvinnslan eignaðist bátinn árið 2016. Hafrafellið gerði það ekki síður gott og varð þriðji aflamesti línubáturinn í fyrra með 1.900 tonn.

„Það eru nokkrir þættir sem hafa mikil áhrif, áhafnarmeðlimir eru góðir sjómenn og okkur vantar aldrei mannskap,“ segir Örn Rafnsson, skipstjóri á Sandfelli, á vef Loðnuvinnslunnar um hvernig tókst að ná þessum árangri. Þá væri mikill kostur að útgerðin tryggði bátnum gott viðhald þannig að aldrei hefur þurft að stöðva veiðar vegna bilunar eða viðhalds.

„Það stendur flott útgerð að baki, þar finn ég að mér, sem skipstjóra, er treyst til að taka bestu ákvarðanirnar eins og hvenær á að fara til sjós og hvenær best er að bíða af sér brælu og þess háttar,“ segir Andrés Pétursson, skipstjóri á Hafrafelli, um árangurinn. „Svo sér útgerðin til þess að við höfum nægar aflaheimildir og ekki má gleyma áhöfninni sem er frábær.“

Innlendar Fréttir