0 C
Grindavik
23. nóvember, 2020

Fimm ráð fyrir þá sem vilja líta vel út á fjarfundum

Skyldulesning

Það er af sem áður var að nú þurfi að standa fyrir framan fataskápinn og velta fyrir sér vinnufatnaði dagsins. Eða að eyða góðum tíma í að hafa sig til áður en lagt er af stað til vinnu. Því þúsundir starfa nú heiman frá í fjarvinnu og til viðbótar við að hitta fólk á fjarfundum, hafa margir fært félagslífið með vinum yfir á netið.

En það er ekki þar með sagt að fólk vilji ekki líta vel út, rétt eins og á við um flesta þegar mætt er til vinnu.

Hér eru fimm góð ráð sem vert er að hafa í huga fyrir fjarfundi.

1. Lýsingin

Lýsingin þarf að varpast beint framan á þig, þ.e. það þarf að passa að ljósið skíni ekki á þig frá hliðum eða á ská eða neðan frá. Eins má birtan ekki vera fyrir aftan þig og þar þarf ekki síst að forðast glugga.

Ef þú ert í gluggalausu rými eða rými sem er nokkuð dimmt ásýndar er gott að stilla lampa upp fyrir framan tölvuna og beina honum þannig að ljósið falli framan í þig.

2. Sjónarhornið

Myndavélin þarf að vera beint fyrir framan þig. 

Margir flaska á þessu, sérstaklega fólk sem er á fjarfundum með fartölvuna fyrir framan sig og horfir því oft niður á skjáinn.

Einfalt og gott ráð er að stilla tölvuna í rétta hæð með því að stafla bókum undir hana. Þú þarft að horfa beint á skjáinn og myndavélin á að vera í augnhæð eða svo.

Eins að muna að sitja upprétt/ur, horfa beint fram og reyna að vera kyrr í sætinu.

Þá er gott að huga að fjarlægð við tölvuna þannig að andlitið sé ekki of nálægt myndavélinni.

3. Húðumhirða

Myndavélin getur látið þig líta mjög vel út en eins tíu sinnum verr út en þú gerir í raun. 

Að huga að ásýnd húðarinnar er því atriði sem vert er að huga að en hana er best að tryggja með því að hugsa sérstaklega vel um húðina almennt.

Mælt er með því að bæði konur og karlar setji á sig rakakrem áður en fundur hefst og ef þörf er á, að nota hyljara á bólur. Ef varir eru þurrar eða sprungnar er mælt með því að setja á sig varasalva áður en fundur hefst.

Einstaka fjarfundarbúnaður, til dæmis Zoom, býður upp á filtera sem gefa andliti og húð jafna áferð.

4. Æfing

Að líta vel út á fjarfundum er ekkert öðruvísi en að taka sig aðeins til áður en fundir eða vinnudagur hefst. Að kíkja aðeins í spegilinn og laga hárið er til dæmis mun skynsamlegra heldur en að fara að laga sig til þegar myndavélin er í gangi og fundur er hafinn.

Langbest er að undirbúa sig með æfingu í mynd. Sumir nota til dæmis símann sinn og tengja sig þannig við tölvuna eins og þeir séu á fundi.

Síðast en ekki síst er mikilvægt að læra á tæknina. Það er til dæmis fátt verra en að uppgötva það að vera í mynd með öðru fólki, án þess að gera sér grein fyrir því.

5. Bakgrunnur

Mælt er með hlutlausum bakgrunni, helst hvítum. 

Þá er mælt með því að það sjáist sem minnst í kringum þig. Það er til dæmis ekki gott að vera með bókahillur á bakvið þig eða að myndavélin nái inn í önnur rými. 

Allt í kringum þig getur haft truflandi áhrif á það fólk sem er með þér á fjarfundinum.


Tengdar fréttir


Stjórnendur þurfa að líta aðeins í eiginn barm í fjarvinnu því þeirra hegðun getur haft mikil áhrif á afkastagetu teymisins.


„Smátt og smátt leyfum við okkur að gera hluti sem við færum aldrei að gera í vinnunni og það getur því miður leitt af sér mistök“ segir Arnar S. Gunnarsson tæknistjóri hjá Origo.


Margir óttast það að aukakílóunum sé að fjölga hratt í fjarvinnu og aukinni heimaviðveru.


Það er jafn mikilvægt að vera vakandi yfir kulnun í fjarvinnu eins og þegar unnið er á vinnustaðnum. Hér eru þrjú góð ráð til að hafa í huga daglega í fjarvinnu.


Nýjar tölur um fjarvinnu gefa vísbendingar um að mögulega séu auknar áskoranir í fjarvinnunni núna í október í samanburði við í sumar. Í dag birtir Atvinnulífið október tölur Gallup um fjarvinnu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.


Fleiri fréttir

Sjá meira

Innlendar Fréttir