0 C
Grindavik
9. mars, 2021

Fiskeldi hefur stutt við gengi krónu í haust

Skyldulesning

Jón Bjarki Bentsson, aðalhagfræðingur Íslandsbanka, segir uppgang í fiskeldi hafi átt þátt í því að koma í veg fyrir frekari halla í utanríkisviðskiptum þrátt fyrir að útflutningstekjurnar hafi orðið fyrir töluverðu höggi.

Ljósmynd/Íslandsbanki

„Fiskeldið hefur bjargað heildartekjum sjávarútvegsins. Þróunin hefur verið mótdræg í sumum sjávarafurðum og verðið gefið eftir en aðrar hafa haldið sér í verði. Selt magn dróst saman en nú eru markaðir með sjávarafurðir að jafna sig aftur. Það ásamt veikari krónu vegur upp verðlækkun í sumum afurðum,“ segir Jón Bjarki Bentsson, aðalhagfræðingur Íslandsbanka, um gengisþróunina í Viðskiptamogganum í dag.

Niðurstaðan sé að útflutningsverðmæti sjávarafurða sé nánast jafn mikið fyrstu níu mánuði ársins og sama tímabil í fyrra.

Þá sýna nýjar tölur um viðskiptajöfnuð tiltölulega hóflegan halla á vöru- og þjónustuviðskiptum og nær engan viðskiptahalla þegar búið er að taka aðra þætti með í reikninginn. Það hafi orðið greinilegur samdráttur í vöru- og þjónustuinnflutningi.

„Það er í raun með nokkrum ólíkindum, í ljósi þess hvað höggið á útflutningstekjurnar er mikið, að ekki skuli vera meiri halli á utanríkisviðskiptunum,“ segir Jón Bjarki. Uppgangur í fiskeldi eigi þar hlut að máli.

Rætt er við Jón Bjarka og Gústaf Steingrímsson, hagfræðing í Hagfræðideild Landsbankans, um gengi krónunnar og áhrif þess í Viðskiptamogganum sem fylgir Morgunblaðinu í dag.

Innlendar Fréttir