0 C
Grindavik
20. janúar, 2021

Fleiri féllu fyrir eigin hendi í október í Japan en af völdum COVID-19 frá upphafi

Skyldulesning

Japanskir sérfræðingar vara nú við andlegri vanlíðunarkreppu vegna heimsfaraldurs kórónuveirunnar. Aðvörunin kemur í tengslum við fjölgun sjálfsvíga á undanförnum mánuðum. Í október tóku 2.153 eigið líf en þetta er mesti fjöldi sjálfsvíga á einum mánuði síðan 2015. Til samanburðar má geta að 2.057 hafa látist af völdum COVID-19 síðan heimsfaraldurinn skall á í byrjun árs.

Yfirvöld hafa reynt að halda aftur af útbreiðslu veirunnar en andstætt því sem hefur verið gert víða annars staðar hefur ekki verið gripið til umfangsmikilla lokana. Áhersla hefur verið lögð á notkun andlitsgríma, að fólk haldi góðri fjarlægð sín á milli, handþvottar og að forðast fjölmennar samkomur innanhúss. Skólum var þó lokað í mars og fram í maí og háskólar lögðu meiri áherslu á fjarkennslu.

En þrátt fyrir að hversdagslífið hafi nú færst nær því sem áður var vara sérfræðingar við áhrifum einangrunar og ótta við starfsmissi, þetta geti leitt til andlegrar heilbrigðiskrísu í landinu.

Sjálfsvígstíðnin hefur aukist sérstaklega mikið hjá konum. Í október tóku 83% fleiri konur eigið líf en í október á síðasta ári. Karlar eru þó í miklum meirihluta þeirra sem fremja sjálfsvíg. Washington Post hefur eftir Michiko Ueda, prófessor í sjálfsvígsforvörnum við Waseda háskólann í Tókýó, að konur hafi farið verr út úr heimsfaraldrinum en karlar. Margar hafi misst vinnuna í ferðaiðnaðinum, smásöluverslun og á veitingastöðum en þessir geirar hafa farið verst út úr faraldrinum.

Sjálfsvígstíðnin í Japan er ein sú hæsta í heiminum og sjálfsvíg eru ein algengasta dánarorsök fólks á aldrinum 15 til 34 ára samkvæmt tölum frá heilbrigðisyfirvöldum. Sjálfsvígstíðnin er 18,5 sjálfsvíg á hverja 100.000 íbúa.

Innlendar Fréttir