6 C
Grindavik
21. apríl, 2021

Fyrsta ákæran í mörg hundruð milljóna peningaþvættismáli birt – Jóhannes áður hlotið dóm fyrir kókaínsmygl

Skyldulesning

Eins og greint var frá í kvöldfréttum RUV um helgina er Héraðssaksóknari með eitt umfangsmesta peningaþvættismál Íslandssögunnar til rannsóknar. Í september í fyrra var greint frá því að þrír hefðu verið úrskurðaðir í gæsluvarðhald og tuttugu yfirheyrðir. Nú liggur fyrir að á fimmta tug eru með réttarstöðu sakbornings, samkvæmt frétt RUV.

Málið snýr að því að fólk, flest ungt fólk á milli tvítugs og þrítugs, hafi verið sent ítrekað í bankaútibú með háar fjárhæðir í seðlum og skipt í evrur. Segir RUV að upphæðirnar hafi yfirleitt verið ein milljón í einu. Fyrir hverja ferð var fólkinu svo greitt um 10 þúsund krónur.

Ein ákæra hefur verið gefin út í málinu og eru þar karl og kona ákærð saman fyrir að hafa þvættað samtals um 27 milljónir króna með ofangreindum hættu.

Höfuðpaurar í málinu eru taldir vera fíkniefnasmyglarar með starfsemi í Suður-Ameríku og Evrópu. Heildarfjárhæðin sem er sögð hafa verið þvættuð með þessum hætti er um 800 milljónir íslenskra króna.

Jóhannes dæmdur fyrir aðild að kókaínsmygli

Annar aðilinn sem ákærður hefur verið af Héraðssaksóknara er Jóhannes Arnar Rúnarsson, 34 ára gamall til heimilis í Reykjavík. Jóhannes er í ákærunni sagður hafa keypt og fengið konuna sem ákærð er með Jóhannesi til þess að kaupa Evrur fyrir reiðufé í bankaútibúum fyrir alls 27 milljónir króna. Kemur fram í ákæru að eignastaða Jóhannesar hafi samkvæmt skattframtölum hans árið 2017, 2018 og 2019 verið neikvæð og framtaldar árstekjur hans á því tímabili verið á bilinu tvær til 3.7 milljónir.

Jóhannes hefur ítrekað gerst brotlegur við lög og hlotið þó nokkra dóma fyrir brot sín. Árið 2009 var hann einn þriggja sem dæmdur var fyrir aðild að kókaínsmygli sem kom upp tveim árum áður, eða í október 2007. Mun Jóhannes hafa fengið stelpu, þá 17 ára gamla, til þess að fara til Kaupmannahafnar og fljúga með um 300 grömm af kókaíni heim til landsins þar sem hún var stöðvuð af tollvörðum á Keflavíkurflugvelli. Þá er Jóhannes sagður hafa ekið henni út á flugvöll og verið í samskiptum við stelpuna sem milliliður milli stelpunnar og höfuðpaurs smyglsins. Jóhannes var því ákærður og dæmdur fyrir „hlutdeild í innflutningi fíkniefna.“ Þá var Jóhannes í því sama máli einnig ákærður fyrir ítrekaðan akstur undir áhrifum fíkniefna, þjófnað og fyrir að kaupa tölvuskjá sem hann vissi að væri þýfi.

Jóhannes játaði sök í málinu og hlaut 12 mánaða fangelsisdóm auk þess sem hann var sviptur ökuréttindum. Í dómnum er sakaskrá Jóhannesar gerð skil, en þar kemur fram að hann hafi fyrir þennan dóm gerst sekur um hraðakstur, akstur undir áhrifum fíkniefna, og að sýsla með falsaða peninga. Dóminn má nálgast hér.

Árið 2018 var Jóhannes jafnframt dæmdur í 90 daga fangelsi fyrir að hafa ekið bifreið réttindalaus. Jóhannes játaði skýlaust sök í málinu. Tók refsingin mið af því að Jóhannes var þar í fimmta sinn fundinn sekur um akstur án ökuréttinda.

spot_img
spot_img
spot_img

Innlendar Fréttir