Gera sjóklárt á grásleppu

0
162

Gámakrani var notaður til að sjósetja Halldór NS í Húsavíkurhöfn. Morgunblaðið/Hafþór Hreiðarsson

Grásleppuvertíðin hefst í dag, 20. mars, og margir sjómenn hafa verið að gera sig klára til veiða að undanförnu. Fyrir helgi var á Húsavík verið að sjósetja Halldór NS 302 sem GPG Seafood gerir út. Bátnum verður nú siglt frá Húsavík til Bakkafjarðar, en þeir 10-15 bátar sem fara á grásleppu verða einmitt flestir við NA-landið.

Leyfilegir veiðidagar í upphafi vertíðar eru 25, en um mánaðamótin, þegar niðurstaða úr togararalli liggur fyrir, verður hugsanlega önnur ákvörðun tekin. Fyrir ári hljóðaði ráðgjöfin upp á 6.972 tonn og þá veiddust 4.293 tonn.

Á vertíðinni nú er fyrst og fremst sóst eftir hrognunum. Kílóverð fyrir þau í fyrra var 160 kr. en ekki liggur fyrir hvað býðst í ár. Sjómenn telja þó hækkun afurðaverðs nauðsynlega. Áður fyrr var sóst eftir að nýta fiskinn sjálfan, sem þá fór á markað í Kína. Fyrir hann tók hins vegar í kóvidfaraldrinum og hefur ekki opnast aftur, segir Örn Pálsson, framkvæmdastjóri Landssambands smábátaeigenda, í samtali við Morgunblaðið.