Gérard Houllier, Frakkinn sem var m.a. knattspyrnustjóri ensku liðanna Liverpool og Aston Villa, og landsliðsþjálfari Frakklands, er látinn, 73 ára að aldri.
Houllier var þjálfari og knattspyrnustjóri í 38 ár og vann m.a. fjóra titla á sex árum sem knattspyrnustjóri Liverpool frá 1998 til 2004.
Hann vakti fyrst athygli þegar hann stýrði Lens í Frakklandi á árunum 1982 til 1985. Hann var í framhaldi af því við stjórnvölinn hjá París SG í þrjú ár, var aðstoðarþjálfari franska landsliðsins 1988 til 1992 og aðalþjálfari þess 1992-93, en var eftir það með yngri landslið Frakka til 1997.
Houllier tók við Liverpool 1998 en hætti með liðið í maí árið 2004. Árið eftir tók hann við Lyon í Frakklandi og var þar í tvö ár. Houllier gerðist knattspyrnustjóri Aston Villa 2010 en varð að hætta störfum af heilsufarsástæðum áður en tímabiliðnu 2010-11 lauk.
Houllier vann franska meistaratitilinn með París SG 1986 og með Lyon 2006 og 2007. Með Liverpool vann hann UEFA-bikarinn, enska bikarinn og deildabikarinn árið 2001 og deildabikarinn aftur 2003. Hann hefur verið aðlaður fyrir störf sín fyrir enskan fótbolta og fengið æðstu heiðursgráður í Frakklandi vegna aðkomu að fótboltanum í heimalandi sínu.
Frá 2012 hefur Houllier starfað hjá Red Bull orkudrykkjaframleiðandanum sem þróunarstjóri knattspyrnuliðanna sem eru í eigu fyrirtækisins en það eru RB Leipzig í Þýskalandi, Salzburg í Austurríki og New York Red Bulls í Bandaríkjunum.
