Gullni hringurinn á­hætta ef spár um ferða­manna­fjölda rætast – Vísir

0
166

Gullni hringurinn á­hætta ef spár um ferða­manna­fjölda rætast Þjóðgarðsvörður á Þingvöllum segir tilefni til að stjórnvöld taki á öryggismálum á vinsælum ferðamannastöðum, sérstaklega í ljósi þess að vona er á minnst tveimur milljónum erlendra ferðamanna til landsins á árinu. Sjúkraflutningamaður segist hræðast að viðbragðsaðilar ráði ekki við þennan mikla fjölda.

Tæpar þrjár vikur eru síðan Hjörtur Howser, leiðsögumaður og tónlistarmaður, lést við Gullfoss rétt rúmlega sextugur. Annar leiðsögumaður, sem var á Gullfossi á sama tíma og veitti Hirti fyrstu hjálp, greindi frá því í samtali við Vísi að símtal hans við neyðarlínuna hafi slitnað vegna sambandsleysis. Hann hafi því þurft að hringja aftur og neyðarvörður að fletta upp málinu, sem tók sinn tíma.

Um fjörutíu mínútum frá fyrsta símtali hafi sjúkrabíll mætt á staðinn. Hjörtur var úrskurðaður látinn á staðnum. Leiðsögumenn og fleiri í ferðaþjónustu hafa síðan kallað eftir að úr þessu verði bætt og að neyðarþjónusta á svæðinu verði endurskoðuð.

Viðbragðsbíll á Þingvöllum Leiðsögumenn sem fréttastofa hefur rætt við um þessi mál undanfarna daga hafa margir hverjir nefnt að heildræna endurskoðun þurfi í málaflokknum. Eitthvað þurfi að gera en þó megi ekki ganga of langt, til dæmis með því að girða af allar náttúruperlur landsins. Langflestir hafa nefnt að vilja eitthvað í líkindum við það viðbragð sem er á Þingvöllum en þar var tekið fast á málum fyrir nokkrum árum eftir slysahrinu í Silfru

„Við erum með viðveru sjúkraflutningamanns alla daga ársins frá níu til fimm og kostnaðurinn fyrir það er greiddur með þeim sértekjum sem við höfum hérna,“ segir Einar Sæmundsen, þjóðgarðsvörður á Þingvöllum. 

Einar Sæmundsen þjóðgarðsvörður á Þingvöllum.Vísir/Arnar Þórður Bogason sjúkraflutningamaður sýndi okkur bílinn sem hann er með á Þingvöllum. Bíllinn er útbúinn öllum þeim tækjum sem mögulega þarf við fyrstu hjálp. Hjartastuðtæki, börur, kaðall ef einhver skyldi detta ofan í gjótu, og svo mætti lengi telja.

„Við erum með allt í bakpokaformi þannig að við getum týnt til og stokkið af stað,“ segir Þórður.

Ferðamenn fegnir að sjá sjúkraflutningamanninn Hann taki á móti fjölda fólks sem annars hefði þurft að kalla á sjúkrabíl til að hlúa að. Þar á meðal sé fólk sem hefur hlotið minniháttar sár eða dottið en langflestir eru gestir úr Silfru. Þaðan komi margir sem ofkælist eða örmagnist á göngunni til baka eftir köfun eða snorkl. Til að taka á móti þeim er aðstaða við bílastæðið við Silfru, þar sem er beddi og hægt að hella upp á kaffi og kakó. 

Finnurðu að fólkinu þyki gott að hafa þig hérna?

„Já, klárlega. Bæði leiðsögumennirnir hjá fyrirtækjunum, sem eru hérna við Silfru, og ferðamennirnir sem koma og segja mér að þeim þyki gott að sjá mig hér.“

Fjöldi ferðamanna er væntanlegur hingað til lands á þessu ári.Vísir/Arnar Samkvæmt spám er von á 2,3 milljónum ferðamanna hingað til lands á þessu ári.

„Ef þessi spá rætist með gríðarlegan fjölda ferðamanna þá er þessi Gullni hringur svokallaði bara svolítil áhætta. Bæði hópbílarnir og einkabílarnir eru að keyra á þessu svæði og það er langt í bjargir,“ segir Þórður. 

Hræðist að viðbragðsaðilar ráði ekki við fjöldann Einar þjóðgarðsvörður segist skilja ákall leiðsögumanna vel. 

„Algjörlega og það er ekkert nöturlegra en að bíða einhvers staðar í 20, 30, 40 eða jafnvel 50 mínútur eftir aðstoð og neyðin yfir öllu. Í raun og veru ætti, hvort sem það er með sértekjum eða á hvaða hátt sem er, að tryggja þessa grunnþjónustu,“ segir Einar. 

Margir þeirra sem leita til sjúkraflutningamanna á Þingvöllum eru ferðamenn sem hafa synt í Silfru og örmagnast eða ofkælst.Vísir/Arnar „Þetta er eitthvað sem öll stjórnvöld verða að taka höndum saman, bretta upp ermar og gera þetta almennilega. “

Þórður tekur undir og ekki bara fyrir Suðurlandið heldur landið allt. Viða séu langt í næstu bjargir og þá þurfi að að horfa til komandi ára.

„Ef spáin er svona mikil aukning er áhugavert að vita hvort við ráðum við þetta. Maður er náttúrulega hræddur við að svo sé ekki.“

Tengdar fréttir Þing­maður segir skort á síma­sam­bandi ó­við­unandi Stefán Vagn Stefánsson, þingmaður Framsóknarflokksins, segir óviðunandi að ekki sé símasamband við þjóðveg 1 eða stærstu ferðamannastaði landsins. Hann kallar eftir að byggt verði upp 5G fjarskiptakerfi eftir færeyskri fyrirmynd.

3. maí 2023 16:05

Ferða­mála­stofa og SAF taka undir á­kall leið­sögu­manna um betri neyðar­þjónustu Ferðamálastofa og Samtök ferðaþjónustunnar taka undir ákall leiðsögumanna um betri neyðarþjónustu á vinsælum ferðamannastöðum. Framkvæmdastjóri SAF segir óásættanlegt að símasamband á neðra plani Gullfoss sé svo slitrótt að símtal leiðsögumanns við Neyðarlínuna hafi slitnað eftir að maður hneig þar niður fyrir tveimur vikum.

2. maí 2023 14:31

Andlát Hjartar skýrt merki um að neyðarþjónustu vanti við Gullfoss Leiðsögumaður, sem varð vitni að andláti tónlistarmannsins Hjartar Howser og veitti honum fyrstu hjálp, segir neyðarþjónustu við Gullfoss og Geysi, vinsælustu ferðamannastaði landsins, til skammar. Tæp klukkustund leið frá því að hann hringdi á Neyðarlínuna eftir að Hjörtur hneig niður og þar til sjúkrabíll kom á vettvang. 

1. maí 2023 07:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið
Fleiri fréttir Sjá meira