6 C
Grindavik
21. apríl, 2021

Héðinn smíðar fyrir Síldarvinnsluna

Skyldulesning

Síldarvinnslan hefur samið við vélsmiðjuna Héðinn um að reisa fiskimjölsverksmiðju fyrir 1,7 milljarða króna.

Ljósmynd/Síldarvinnslan

Síldarvinnslan undirritaði í gær samning við vélsmiðjuna Héðin um smíði á 380 tonna fiskimjölsverksmiðju sem sett verður upp í Neskaupstað, að því er fram kemur í færslu á vef Síldarvinnslunnar.

Sagt var frá því í janúar að Síldarvinnslan hygðist stækka fiskimjölsverksmiðju sína í Neskaupstað úr 1.400 tonna sólarhringsafköstum í 2.380 tonna afköst og jafnframt yrði komið upp lítilli verksmiðjueiningu sem gæti afkastað allt að 380 tonnum á sólarhring. Samningurinn við Héðin nær til minni einingarinnar.

Smíðin mun kosta 1,7 milljarða króna samkvæmt samningnum og er gert ráð fyrir að fiskimjölsverksmiðjan verði afhent í maí 2022.

Fram kemur í færslunni að „tilgangurinn með því að koma upp lítilli verksmiðjueiningu er að auka hagkvæmni til dæmis með því að spara orku og gert er ráð fyrir að á síldar- og makrílvertíð verði einungis litla verksmiðjan starfrækt enda fer megnið af síldinni og makrílnum til manneldisvinnslu“.

Jafnframt ætti að vera nægilegt að reka smærri eininguna á smærri loðnuvertíð. „Sem dæmi má nefna að á yfirstandandi vertíð voru 9.700 tonn af loðnu fryst í fiskiðjuveri Síldarvinnslunnar en einungis 120 tonn fóru til vinnslu í fiskimjölsverksmiðjunni. Vinnsla á kolmunna mun hins vegar fara fram í stóru verksmiðjunni sem verður þá rekin með hámarksafköstum.“

Frá undirritun samningsins í gær. Talið frá vinstri: Hafþór Eiríksson rekstrarstjóri fiskimjölsverksmiðja, Jón Már Jónsson yfirmaður landvinnslu, Gunnar Pálsson verkfræðingur hjá Héðni, Gunnþór B. Ingvason framkvæmdastjóri, Ragnar Sverrisson framkvæmdastjóri Héðins og Jakob Valgarð Óðinsson tæknifræðingur hjá Héðni.

Ljósmynd/Smári Geirsson

spot_img
spot_img
spot_img

Innlendar Fréttir