Brotist var inn á heimili Paul Pogba. AFP/Lindsey Parnaby
Á meðal þess sem innbrotsþjófarnir sem brutust inn til franska knattspyrnumannsins Paul Pogba fyrr í mánuðinum höfðu á brott með sér var gullmedalía hans frá heimsmeistaramótinu 2018. Miðjumaðurinn greinir frá í viðtali við L’Équipe.
Brotist var inn til Pogba á meðan hann lék með Manchester United við Atlético Madrid í Meistaradeildinni þriðjudaginn 15. mars. Börn leikmannsins sváfu á meðan innbrotsþjófarnir létu greipar sópa en barnfóstra leikmannsins sá til þess að þau væru örugg.
„Þeir stálu skartgripum sem móðir mín gaf mér og HM-medalíunni. Það sem var hræðilegast var samt að börnin mín tvö voru heima á meðan atvikið átti sér stað. Barnfóstran heyrði hvað var í gangi og var fljót að læsa sig og strákana inn í herbergi. Hún var í áfalli í nokkra daga en það mikilvægasta er að börnin mín eru í lagi,“ sagði Pogba við L‘Équipe.
