Hneykslismál skekur Þýskaland – Læknir lét ræstitækni aðstoða sig við aflimun – DV

0
120

Læknir, sem starfaði í borginni Mainz í Þýskalandi, var rekinn úr starfi í síðustu viku. Ástæðan er að hann fékk ræstitækni, konu, til að aðstoða við aflimun. Bild skýrir frá þessu. Fram kemur að þetta hafi átt sér stað í október 2020 en það hafi ekki verið fyrr en í síðustu viku sem lækninum var endanlega vikið úr starfi hjá Háskólasjúkrahúsinu í Mainz.

Norbert Pfeiffer, formaður stjórnar sjúkrahússins, sagði í samtali við Bild að þetta hafi aldrei átt að gerast. Læknirinn hafi gerst sekur um mistök.

Konan var við hefðbundin störf sín á sjúkrahúsinu þegar hún var beðin um að halda fótlegg sjúklings föstum vegna þess hversu órólegur hann var. Taka átti tá af honum. Kona var einnig beðin um að rétta lækninum bómullarpinna.

Hún hafði hvorki hlotið tæknilega þjálfun varðandi læknisaðgerðir né þjálfun varðandi það hreinlæti sem þarf að viðhafa á skurðstofum þegar læknirinn kallaði hana inn á skurðstofuna.

Sjúklingurinn slapp óskaddaður frá þessu.

Aðgerð af þessu tagi flokkast sem rútínuaðgerð og því er það oft aðeins skurðlæknirinn sem er til staðar á skurðstofunni.