Hrintu af stað spænskri saltfiskbolluhátíð

0
162

Svandís Svavarsdóttir ásamt spænskum matreiðslumeisturum. Ráðherra opnaði matarhátíðina „Ruta de Bunyols de Bacallá“ eða „Á saltfiskbolluslóðum“. Ljósmynd/Íslandsstofa

Matarhátíðinni „Ruta de Bunyols de Bacallá“ (ísl. Á saltfiskbolluslóðum) var hrint af stað samhliða og alþjóðlega sjávarútvegssýningin Seafood Expo Global í Barselóna á Spáni.

„Ruta de Bunyols de Bacallá“ er samstarf markaðsverkefnisins Bacalao de Islandia, Gremi de Bacallaners de Cataluña (félag saltfisksölumanna í Katalóníu), Olis Bargalló (Katalónskur framleiðandi ólífuolíu) og Mercats de Barcelona (matarmarkaðir Barcelonaborgar), að því er segir á vef Íslandsstofu.

Svandís Svavarsdóttir matvælaráðherra flutti ávarp við opnun hátíðarinnar á þriðjudag síðastliðinn. Á hátíðnni munu 25 veitingastaðir og 10 matarmarkaðir í Barcelona bjóða upp á sína útgáfu af saltfiskbollum úr íslenskum fiski frá 26 apríl til 12 maí. Rétturinn er vinsæll skyndibiti víða í Katalóníu. Einnig verður boðið upp á vinnustofur fyrir börn á matarmörkuðum þar sem þau geta lært að elda saltfiskbollur úr íslenskum fiski.

Formleg opnun salfiskbollu-hátíðarinnar fór fram á hinum þekkta matarmarkaði La Boqueria í miðborg Barselóna. Að opnun lokinni hélt ráðherra ásamt föruneyti til hádegisverðar á Mercat Ninot, þar sem má finna fleiri þátttakendur í hátíðinni.