Enginn gaf sig fram við lögregluna þegar hún ætlaði að skerast í átök í Austurbænum. mbl.is/Ari
Um klukkan hálf eitt í nótt barst lögreglunni á höfuðborgarsvæðinu tilkynning um átök á bar í Austurbæ Reykjavíkur. Þegar lögreglu bar að garði gaf sig enginn á tal við lögregluna vegna átakanna.
Málið verður því ekki rannsakað frekar, er kemur fram í dagbók lögreglunnar.
Klukkan hálf tvö í nótt var tilkynnt um innbrot í geymslu í fjölbýlishúsi. Þegar íbúar hússins urðu varir við innbrotsþjófana hlupu þeir á brott.
Þá voru nokkrir aðilar aðstoðaðir af lögreglunni við að komast heim „eftir að þeir höfðu gengið of hratt um gleðinnar dyr“.
Einnig var brotist inn í fyrirtæki um klukkan hálf tvö. Búið var að taka einhverja muni úr fyrirtækinu þegar lögreglan mætti á vettvang og er málið í rannsókn.
