4 C
Grindavik
18. apríl, 2021

Innbrotsþjófurinn stal myndavélum, tölvum og klósettpappír

Skyldulesning

Óskemmtileg aðkoma beið þeirra Svölu Jóhannsdóttur og Emils Christoffers Bager Holm þegar þau komu heim úr vinnu í gær. Óprúttinn aðili hafði brotist inn á heimili þeirra í Laugardalnum og stolið öllu steini léttara, allt frá dýrum myndvélabúnaði, tölvum og yfirhöfnum yfir í klósettpappír og óhreinatau parsins.

„Við erum alveg miður okkar, bara í algjöru áfalli. Það var öllu rænt af okkur og við erum eiginlega bara alls laus,“ segir Svala í samtali við fréttastofu.

Öllum fötunum hans Emils var stolið af þjófnum, nær öllum raftækjum af heimilinu, förðunarvörum Svölu, skóm, yfirhöfnum og svo mætti lengi telja.

„Klósettpappírnum var meira að segja stolið, óhreina tauinu okkar og meira að segja kynlífstækjum. Öll handklæði og rúmföt. Það var bara allt tekið,“ segir Svala.

„Hann hefur verið með einhverja yfirnáttúrulega krafta“

Nágrannar þeirra Svölu og Emils höfðu komið að opinni útidyrahurðinni, ekki litist á blikuna og hringt í Emil, sem dreif sig heim úr vinnunni og kom að heimilinu sem lagt hafði verið í rúst um klukkan hálf fimm.

Svala segir að þjófurinn hafi brotist inn um eldhúsgluggann, en það var augljóst þar sem skófar var í gluggakistunni. Þaðan fór hann ránshendi um íbúðina alla eins og áður segir og braut og bramlaði það sem hendi var næst.

Þjófurinn sneri sófa parsins á hvolf sem brotnaði í hamaganginum, braut prentara og virðist sem hann hafi opnað alla skápa og skúffur og hrint öllu niður á gólf.

„Hann hefur verið með einhverja yfirnáttúrulega krafta því hann hrinti upp sófanum alveg upp á rönd og braut hann, eyðilagði plötuspilarann okkar, eyðilagði prentara og braut glös,“ segir Svala.

„Hann fór í gegn um nærfataskúffurnar okkar beggja og alla persónulega muni, það var allt á öðrum endanum. Hann tók óhreina tauið okkar beggja og klósettpappírinn sem ég var nýbúin að kaupa í gær dýrum dómum í Krambúðinni,“ segir Svala og hlær.

„Við erum búin að reyna að sjá það sem er fyndið líka en við förum fram og til baka við að hlæja að þessu og svo gráta líka þannig að allar tilfinningarnar eru til staðar“ segir Svala.

Tjónið hleypur á milljónum króna

Þjófurinn náðist á myndband þar sem hann bakkaði bifreið sinni inn í bílastæði Emils og Svölu. Bíllinn er blár Lexus jeppi, en ekki sást bílnúmer á myndbandinu. Þá sást þjófurinn á myndbandinu en ekki svo vel að hann þekktist. Maðurinn er hávaxinn og dökkhærður, hann var klæddur í dökkan síðan frakka og haltraði.

„Maðurinn var byrjaður að bera eitthvað út í bíl, það sást á myndbandinu. Það sást ekki skýr andlitsmynd en við vitum hvernig bíl hann er á allavega,“ segir Svala.

„Við erum eiginlega að taka bara hvern klukkutímann í einu, þetta er alveg ofboðslegt áfall,“ segir Svala.

Tjónið sem þau hafa orðið fyrir hleypur á milljónum, bæði vegna tækja sem var stolið og rándýrra yfirhafna, þar á meðal pelsa, úlpu frá 66 norður og mokkakápu sem Svala erfði frá ömmu sinni og var sérsaumuð á hana á áttunda áratugnum.

„Hann tók fullt af myndavélabúnaði, hörðum drifum fullum af ljósmyndum og öllum tölvunum okkar var stolið og yfirhöfnum sem eru mörg hundruð þúsund króna virði,“ segir Svala.

„Rándýr útivistafatnaður og mikið af munum með tilfinningalegt gildi. Allt sem ég erfði eftir ömmur mínar báðar, allir skartgripir farnir. Svo var ég með spegil af æskuheimili mínu sem hefur verið í fjölskyldunni í áratugi sem hann tók. Svo mokkakápa sem var sérsaumuð á ömmu mína á áttunda áratugnum, þetta voru hlutir sem ég hélt ég myndi taka með mér nánast í gröfina,“ segir Svala.

„Það er ekkert sem bætir það.“

Eins og sjá má hafði þjófurinn hraðar hendur.Aðsend/Svala

Blessunarlega bjargaðist kisa

Svala segir að fólkið í kring um þau hafi verið ótrúlega stuðningsríkt og brugðist snarlega við þegar fréttir bárust af innbrotinu.

„Við erum búin að fá ótrúlega mikinn stuðning frá fólki í hverfinu og fólki í kring um okkur og erum búin að fá handklæði að gjöf og mat og Emil er búinn að fá eitthvað af fötum gefins. Svo hefur fólk verið að leggja eitthvað inn á reikninginn hjá okkur líka,“ segir Svala.

Kötturinn þeirra Svölu og Emils var heima þegar þjófurinn fór ránshendi um íbúðina en Svala segir að til allrar lukku sé hún ómeidd. Hún hafi verið mjög skelkuð en til allrar hamingju hafi ekki orðið nein slys á fólki.

Þjófurinn tók nær allar yfirhafnir parsins og skó, og braut prentara í leiðinni.Aðsend/Svala

„Sem að lögreglan hefur aldrei séð áður,“ segir Svala. „Þetta var svolítið eins og að labba inn í sakamálaþátt þegar maður kom heim. Þetta var eins og kjarnorkusprengja, og allt einn maður.“

Hún segist gáttuð á því hvað þjófurinn hafi tekið handahófskennda hluti í ráninu.

„Hann skildi eftir lítið sjónvarp, myndavél og iPad svo tók hann einhverja mjög handahófskennda hluti eins og óhreina tauið okkar og klósettpappír. Þetta nær bara engri átt,“ segir Svala.

„Ég bara innilega vona að hann finnist og eitthvað af þessum munum komi í leitirnar, sérstaklega þeir sem ekki er hægt að bæta upp.

Hún segir ránið mjög mikið áfall nú á aðventunni. Þjófurinn hafi tekið heilan helling af jólagjöfum sem þau hafi verið búin að kaupa og ólíklegt sé að þau geti gefið jólagjafir í ár.

Málið er nú til rannsóknar hjá lögreglu. Hægt er að styrkja þau Svölu og Emil og eru reikningsupplýsingarnar eftirfarandi:

Reikningsnúmer: 0513-14-404921, kt. 3008952479

Innlendar Fréttir