10.2 C
Grindavik
24. júní, 2021

Innflytjandi á hættuslóðum – Hættulegt líf frægasta úlfsins í Noregi

Skyldulesning

Hvað á að gera við úlf sem áttar sig ekki á hvar hann á að halda sig til að njóta friðunar og hvar hann er réttdræpur? Auðvitað veit úlfurinn það ekki en margir Norðmenn velta nú vöngum yfir hvað eigi að gera við innflytjanda á hættuslóðum, það er að segja finnsk-rússneskan úlf sem er nú í Noregi. Úlfurinn þykir mjög verðmætur og mikilvægur erfðafræðilega séð en hann á erfitt með að halda sig í friðlandinu þar sem ekki má drepa hann.

Samkvæmt umfjöllun Norska ríkisútvarpsins, NRK, þá hefur umræddur úlfur, sem kom annað hvort frá Finnlandi eða Rússlandi, valdið ákveðnum vandræðum og vakið upp spurningar um þau mörk sem Norðmenn hafa komið á varðandi svæði þar sem úlfar eru friðaðir. Utan þeirra má skjóta þá þegar veiðar eru heimilar en þeim er stýrt eftir ströngum reglum.

Umræddur úlfur er sérstaklega í kastljósinu því hann þykir mjög verðmætur, erfðafræðilega séð, fyrir úlfastofnana í Skandinavíu. Erfðafræðilegur fjölbreytileiki úlfastofnanna í Skandinavíu er orðinn lítill og nauðsynlegt þykir að fá ferskt erfðaefni inn í stofnana til að stöðva þá miklu innrækt sem á sér stað meðal þeirra fáu dýra sem leika lausum hala. Af þessum sökum þykir umræddur úlfur nánast vera himnasending og er þess nú beðið að hann skili afkvæmum frá sér.

En hann hefur verið til vandræða því hann hefur átt erfitt með að halda sig á verndarsvæðinu í Kongsviger en þangað var hann fluttur á síðasta ári eftir að það tókst að svæfa hann við Elgå, þar sem má veiða úlfa. Tækifærið var nýtt og gps-sendir var settur á hann og því er hægt að fylgjast náið með ferðum hans. Fljótlega var hann kominn út fyrir verndarsvæði úlfa og það hefur vakið reiði meðal bænda sem óttast um bústofna sína. Með því að fara út fyrir verndarsvæðið hefur úlfurinn í raun stækkað það því ekki má skjóta hann vegna hins eftirsótta erfðaefnis hans.

Miðflokkurinn (Senterpartiet) lagði því til að ekki mætti stækka verndarsvæði úlfa því það brjóti gegn samningi um meðferð rándýra en hann var gerður 2011. Samningurinn kveður á um að þak er sett á hversu mörg villt dýr mega vera í Noregi. Tillaga Miðflokksins var þó ákveðin afstöðubreyting því flokkurinn hafði fram að þessu krafist þess að umræddur úlfur yrði skotinn.

Náttúruverndarsinnar og úlfavinir eru ósáttir við þetta og segja að Norðmönnum beri skylda til að venda dýr sem eru í útrýmingarhættu en það eru skandinavískir úlfar.

En tillaga Miðflokksins var samþykkt á Stórþinginu í síðustu viku og segja náttúruverndarsamtök það vera hneyksli: „Þetta snýst ekki um að stækka verndarsvæði úlfa, þetta snýst um að vernda mikilvægasta úlf Noregs,“ sagði talsmaður einna samtaka í samtali við NRK. WWF náttúruverndarsamtökin gagnrýna ákvörðunina einnig og segja að lögin opni fyrir tilviljanakennda og ógegnsæja stjórnun í málaflokki rándýra. Samtökin hafa því stefnt ríkinu fyrir dóm og er þess vænst að hæstiréttur taki það fyrir í vor. Samþykkt þingsins kveður á um að frá 15. janúar gildi þær tímabundnu stækkanir verndarsvæða úlfa, sem voru gerðar fyrir úlfinn verðmæta, ekki lengur. Það þýðir að þá má skjóta hann en heimild hefur verið gefin til að skjóta 27 úlfa á þessu veiðitímabili.

Sveinung Rotevatn, umhverfisráðherra, er því nú að láta undirbúa að úlfurinn verði svæfður og fluttur inn á verndarsvæði. „Það væri mjög óheppilegt ef hann verður skotinn,“ er haft eftir honum í fréttatilkynningu þar sem hann vísar einnig til hættunnar á innrækt í úlfastofninum og því sé mikilvægt að úlfurinn, sem er karldýr, lifi áfram.

spot_img
spot_img
spot_img

Innlendar Fréttir