island-greiddi-atkvaedi-med-brottvisun-russlands

Ísland greiddi atkvæði með brottvísun Rússlands

Rússnesk skip í Hafnarfjarðarhöfn fyrir nokkrum árum. Ísland studdi tillögu um að vísa Rússlandi tímabundið úr ICES. mbl.is/Jim Smart

Rússlandi hefur tímabundið verið vísað úr Alþjóðahafrannsóknaráðinu (ICES) en fulltrúaráð ráðsins samþykkti tillögu þess efnis með atkvæðum 18 ríkja gegn einu, en eitt ríki sat hjá. Ísland var eitt þeirra ríkja sem greiddi atkvæði með brottvísuninni, að því er fram kemur í tilkynningu á vef stjórnarráðsins.

„Ljóst er að brotthvarf Rússlands getur haft talsverð áhrif til lengri, t.d. hvað varðar ráðgjöf vegna veiða á úthafskarfa. Brotthvarfið hefur þó mest áhrif á samstarf ráðsins um Barentshafið en mun einnig hafa áhrif í Eystrasaltinu og á ráðgjöf sameiginlegra stofna þar sem rússneskir vísindamenn safna gögnum fyrir þá ráðgjöf,“ segir í tilkynningunni.

Alls eiga 20 ríki við Norðaustur-Atlantshaf aðild að ráðinu og er Ísland eitt þeirra. Hafrannsóknastofnun er sögð hafa átt mikið samstarf við ráðið um rannsóknir og ráðgjöf.

Í ályktun fulltrúaráðs ICES segir meðal annars: „Til  að geta uppfyllt skyldur okkar og sinnt verkefnum fyrir þá sem óska eftir ráðgjöf frá ICES  þarf víðtækt samstarf við lykilsérfræðinga. […] Stríðið í Úkraínu grefur undan víðtæku samstarfi  margra vísindastofnana, þar á meðal ICES.“

Allir fundir áfram á dagskrá

Allir fundir ráðsins frá og með deginum í dag eru enn á dagskrá óháð brotthvarfi Rússa. Þá fer fram rýnifundur um aflareglur steinbíts, löngu, keilu og skarkola í næstu viku. „Það bendir því allt til að ráðgjöf ICES um þá stofna sem eru innan íslensku lögsögunnar og samningur ráðsins og Íslands nær yfir, muni koma út þann 15. júní eins og upphaflega var stefnt að. Frestun á fundum myndi hafa í för með sér áhrif á tímasetningu og gæði ráðgjafar innanlands,“ segir í tilkynningu íslenskra stjórnvalda

Vakin er athygli á því að framkvæmdastjórn ICES mun fylgjast með gangi mála og leggja fram tillögu um að hleypa Rússum aftur í ráðið þegar viðeigandi þykir.


Posted

in

,

by

Tags: