Ísland mætir Tyrklandi, Búlgaríu og Úkraínu í forkeppni Ólympíuleikana Hjörtur Leó Guðjónsson skrifar 1. maí 2023 12:31
Íslenska karlalandsliðið í körfubolta verður í C-riðli í forkeppni fyrir Ólympíuleikana í París sem fram fara á næsta ári.
Forkeppnin fer fram í sumar og verður Ísland með Tyrklandi, Búlgaríu og Úkraínu í C-riðli. Dregið var í Filippseyjum í dag, en 16 Evrópuþjóðir voru í pottinum.
Leikirnir sem Ísland leikur í forkeppninni í sumar eru hluti af fyrri hluta undankeppninnar fyrir Ólympíuleikana. Þær Evrópuþjóðir sem taka þátt á HM í Indónesíu, Filippseyjum og Japan í ágúst og september á þessu ári þurfa ekki að fara í gegnum fyrri hlutann.
Aðeins tvær af þeim 16 þjóðum sem taka þátt í fyrri hluta undankeppninnar komast í seinni hlutann og þaðan vinna fjórar þjóðir sér inn þátttökurétt á Ólympíuleikunum.
