Ítalskur fangi á Hólmsheiði verður framseldur til Rómar – Sakfelldur fyrir manndrápstilraun með kylfu, glerflöskum, spörkum og hnefahöggum – DV

0
151

Landsréttur hefur staðfest þann úrskurð Héraðsdóms Reykjavíkur að ítalskur maður sem er í varðhaldi í fangelsinu á Hólmsheiði skuli framseldur til Rómar á grundvelli evrópskrar handtökuskipunar.

Maðurinn flúði land er hann átti eftir að afplána átta ár af ellefu ára fangelsisdómi sem hann hlaut fyrir í manndrápstilraun þar sem beitt var kylfum, glerflöskum, spörkum og höggum. Fimmtán manns tóku þátt í árásinni.

„Í skýrslu varnaraðila fyrir lögreglu vildi hann ekki tjá sig um sakargiftir og málsatvik en vildi ekki verða afhentur ítölskum yfirvöldum og óttaðist að hann yrði drepinn í fangelsi ef til þess kæmi. Hann gerði nokkra grein fyrir högum sínum hérlendis hvar hann byggi og að hann hefði framfærslu af greiðslum frá íslenska ríkinu og vegna vinnu sem hann sinnti án þess að laun væru gefin upp. Hann bar um að eiga enga ættingja hérlendis,“ segir í úrskurði héraðsdóms. Ítalinn segist hafa orðið fyrir áfalli í fangelsi á Ítalíu en gaf ekki skýringu á því hvers vegna hann hefði talið nauðsynlegt að flýja land.

Maðurinn og verjandi hans töldu að ekki hefði farið fram nægilega ítarleg rannsókn á beiðininni um framsal. „Að ekki hafi farið fram viðhlítandi rannsókn á beiðninni og grundvelli hennar en varnaraðili haldi því fram að hann hafi þegar afplánað þriggja ára refsingu í Ítalíu og hafi í kjölfarið verið látinn laus. Varnaraðili hafi einnig greint frá því að málið hafi verið endurupptekið 2020 og það dæmt að honum fjarstöddum,“ segir í úrskurðinum.

Hvorki héraðsdómur né Landsréttur tóku undir þetta og hafa nú bæði dómstigin úrskurðað að maðurinn skuli framseldur til Ítalíu.

Sjá úrskurði Landsréttar og héraðsdóms