Kapp kaupir allt hlutafé í Raf

0
114

Hjalti Halldórsson, Valþór Hermannsson og Freyr Friðriksson við undirskriftina í dag. Ljósmynd/Aðsend

Kapp ehf. hefur fest kaup á öllu hlutafé í Raf ehf. og var gengið frá samningum þess efnis á alþjóðlegu sjávarútvegssýningunni í Barselóna á Spáni.

„Ég met það svo að sú mikla þekking og reynsla starfsfólks Raf sem og sá vélbúnaður sem fyrirtækið framleiðir muni styrkja Kapp til frekari sóknar í íslenskum sjávarútvegi og fiskeldi,“ segir Freyr Friðriksson, eigandi Kapp, í tilkynningu. Telur hann að með kaupunum skapist mikil tækifæri til vaxtar.

Kapp þjónustar fyrirtæki í matvælavinnslu til sjós og lands og er kæling matvæla þar í lykilhlutverki. Fyrirtækið rekur einnig véla- og renniverkstæði og sér meðal annars um innflutning á kælitækjum frá Incold, Carrier og Titan containers. Hátæknifyrirtækið Raf sérhæfir sig hins vegar í vélasmíði, innflutningi og þjónustu á tækjabúnaði fyrir sjávarútveg, fiskeldi og annan iðnað.

Flaggskip KAPP er vörumerkið OPTIM-ICE, en undir því framleiðir fyrirtækið meðal annars forkæla og ískrapavélar. mbl.is/Kristinn Magnússon

Engar breytingar á starfsmannahaldi Engar breytingar verði á starfsmannahaldi Raf eða þeirri þjónustu og búnaði sem Raf hefur boðið viðskiptavinum sínum að sögn Valþórs Hermannssonar, sem stýrt hefur Raf í tæp 20 ár. Hann mun taka sæti í stjórnendateymi sameinaðs félags „Með Kapp munu auknir kraftar losna úr læðingi þar sem mikill mannauður og reynsla sameinast í þessum tveimur fyrirtækjum,“ segir Valþór.

„Eftir 12 ára eignarhald okkar í Raf og góðan rekstur síðustu ára teljum við að núna sé réttur tímapunktur til að selja félagið. Við höfum átt mjög gott samstarf við stjórnendur Kapp á undanförnum árum og samtöl undanfarna mánuði leiddu til að gengið var frá sölu félagsins og erum fullviss um að Kapp sé rétti aðilinn til að taka við keflinu núna,“ segir Hjalti Halldórsson, annar eiganda Raf.