4 C
Grindavik
7. mars, 2021

Kvennalið Tottenham æfir nú á sama æfingasvæði og karlaliðið

Skyldulesning

Kvennalið Tottenham er nú í fyrsta skipti að æfa á hverri einustu æfingu á sama æfingasvæði og karlalið félagsins. Áður fyrr æfðu þær aðeins einu sinni í viku á æfingasvæði karlanna.

Rehanne Skinner þjálfari liðsins segir þetta sýna vilja hjá félaginu að gera betur fyrir kvennaliðið. „Með þessari breytingu fáum við ótrúlega góða aðstöðu sem hjálpar okkur við að hækka staðalinn sem við viljum ná. Við viljum reyna að þróa samkeppnishæfara lið með tíð og tíma,“ segir Skinner.

Skinner bætir við að félagið sé meðvitað um markmið liðsins og að það vilji halda áfram að styðja við þá þætti sem þær þurfa til að ná þeim. „Við höfum allt í kringum leikmennina sem við þurfum til að búa til umhverfi þar sem frammistaðan er góð. Það sem við höfum aðgang að núna á æfingasvæðinu er ótrúlegt og það er augljóst að leikmennirnir eru himinlifandi yfir því að vera í þessu umhverfi, sem er frábært,“ segir Skinner.

Skinner, sem tók við liðinu í síðasta mánuði, segir að þessi breyting hafi legið í loftinu. „Félagið gerði sér grein fyrir því að aðstaðan hjá kvennliðinu þyrfti að þróast. Það sýnir áhuga þeirra á kvennaliðinu vegna þess að þeim fannst þetta vera rétt skref,“ bætti hún við.

„Fyrir mér er þetta yfirlýsing um þann vilja sem er hjá félaginu, að fylgjast með kvennaliðinu og taka þær með. Þetta er mjög jákvætt skref fyrir alla,“ segir Skinner.

Skinner þjálfaði áður Arsenal og var einnig aðstoðarþjálfari enska landsliðsins.

Athygli vakti þegar bandaríska landsliðskonan Alex Morgan gekk til liðs við Tottenham í september. Morgan var í liði Bandaríkjanna sem varð heimsmeistari árið 2015 og 2019.

Innlendar Fréttir