-1 C
Grindavik
21. janúar, 2021

Landsliðsþjálfari Íslands sagður hafa verið ölvaður og farið yfir strikið þegar hann ræddi við stelpurnar

Skyldulesning

Jón Þór Hauksson landsliðsþjálfari kvennalandsliðsins í knattspyrnu er sagður hafa verið ölvaður og hafa farið yfir strikið í samræðum við leikmenn liðsins á þriðjudag. Þetta gerðist sama kvöld og Ísland tryggði sig inn á Evrópumótið. Það er Fótbolti.net sem fjallar um málið.

„Í fögnuði um kvöldið var áfengi haft um hönd og þá komu upp atvik. Jón Þór Hauksson þjálfari íslenska liðsins var undir áhrifum áfengis og þótti hafa farið yfir strikið í samræðum við leikmenn sem sumar voru í uppnámi,“ skrifar Hafliði Breiðfjörð í grein á Fótbolta.net í dag.

Jón Þór kom liðinu inn á Evrópumótið með sigri á Ungverjalandi og eftir þann leik var fagnað. „ Ég tók þátt í að fagna okkar árangri og eftir á að hyggja voru það mistök. Ég hef rætt við hluta þeirra leikmanna sem ég átti þessi samtöl við og beðist afsökunar,“ segir Jón Þór í samtali við Hafliða Breiðfjörð á Fótbolta.net.

Í frétt Fótbolta.net kemur fram að miðilinn hafi sent fyrirspurn á KSÍ vegna framkomu Jóns. „Óskaði Fótbolti.net svara um áfengisdrykkju í landsliðsferðum og í kringum leikmenn í hópnum sem ekki eru sjálfráða,“ segir í frétt miðilsins.

Klara Bjartmarz framkvæmdarstjóri KSÍ segir málið til skoðunar hjá sambandinu.

Innlendar Fréttir