5 C
Grindavik
18. apríl, 2021

Leggja til tuttugu breytingar á fjárhagsáætlun

Skyldulesning

Frá fundi í borgarstjórn Reykjavíkur í haust.

Borgarstjórnarflokkur Sjálfstæðisflokksins mun á borgarstjórnarfundi í dag leggja til tuttugu breytingartillögur við frumvarp að fjárhagsáætlun Reykjavíkurborgar fyrir árið 2021.

Frá þessu greinir flokkurinn í tilkynningu.

Segir þar að meðal þess sem lagt sé til, er að að gera fólki kleift að eignast félagslegt leiguhúsnæði Félagsbústaða, að rekstur sorphirðu í borginni verði boðinn út og að Gagnaveita Reykjavíkur og Malbikunarstöðin Höfði, sem eru fyrirtæki á samkeppnismarkaði, verði seld og skuldir lækkaðar til samræmis.

„Þá er lagt til að hagrætt verði í miðlægri stjórnsýslu og að fallið verði frá fjárfestingu í Grófarhúsinu sem ráðgert er að kosti á fimmta milljarð króna, auk fjölda annarra tillagna,“ segir í tilkynningu flokksins.

Núverandi plan gangi ekki upp til lengdar

Haft er eftir Eyþóri Arnalds, oddvita Sjálfstæðisflokksins, að nauðsynlegt sé að borgin létti byrðum af borgarbúum og fyrirtækjum á þessum erfiðu tímum.

„Tillögur sjálfstæðismanna, sem eru tuttugu talsins, miða að því að beina fjárfestingum í réttan farveg og minnka báknið með það fyrir augum að lækka álögur á fólk og fyrirtæki í Reykjavík á þessum erfiðu tímum. Ein tillagan lýtur að því að þeir sem leigja nú hjá Félagsbústöðum geti keypt íbúðina sem þeir leigja, en samkvæmt könnun Íbúðalánasjóðs vilja 80% leigjenda eignast sína eigin íbúð,“ segir Eyþór.

„Reykjavíkurborg gerir ráð fyrir stórfelldri skuldsetningu að óbreyttu. Við viljum vinda ofan af þeirri þróun með því selja fyrirtæki borgarinnar sem eru í samkeppnisrekstri eins og Malbikunarstöðina Höfða og Gagnaveituna en þar liggja tugir milljarðar. Stórhækkað vaxtaálag á borgina sýnir að núverandi plan gengur ekki upp til lengdar.“

Fundur borgarstjórnar hófst klukkan 10 og er streymt beint hér að neðan:

Innlendar Fréttir