7 C
Grindavik
23. apríl, 2021

Leikstjóri Dune sendir AT&T og Warner Bros. kaldar kveðjur

Skyldulesning


Heiðar Sumarliðason skrifar

Leikstjóri stórmyndarinnar Dune, Denis Villeneuve, hefur sent Warner Bros. og AT&T tóninn í bréfi sem birtist á vefsíðu kvikmyndatímaritsins Variety.

Gremja Villeneuve beinist að ákvörðun Warner Bros. að gefa kvikmynd hans Dune út samtímis á HBO-Max og í kvikmyndahúsum. Áður var búið að ákveða að seinka útgáfu myndarinnar, sem upprunalega átti að koma út nú um jólin, fram í október 2021. Leikstjórinn hafði ekkert við það að athuga, en þegar tilkynnt var um samhliða streymis- og bíóútgáfu kom annað hljóð í strokkinn. 

Í fyrrnefndu bréfi segir hann símarisann AT&T, eiganda Warner, vera sama um kvikmyndahúsaiðnaðinn, sem og áhorfendur. Hjá þeim snúist allt um hvernig staða AT&T á Wall Street líti út og að kvikmynd hans sé fórarlamb þess að fyrirtækið sé að reyna að rétta af fjárhagsstöðu sína. Það skuldar nú um 150 milljarða dollara. 

Leikstjórinn lætur í sér heyra.

Hann segir sjósetningu HBO-Max á markaði hafa mistekist og að AT&T sé að fórna öllum kvikmyndum Warner vegna þess. Hann heldur svo áfram og segir: 

„Skyndilegur viðsnúningur Warner, að fara frá því að vera heimili kvikmyndagerðarmanna, yfir í algjört skeytingarleysi teiknar upp skýra línu fyrir mér. Kvikmyndagerð er samstarf, sem krefst algjörs trausts á liðsheildina, en Warner hafa með þessu lýst því yfir þeir séu ekki lengur með okkur í liði.“

Hann segir þó að streymisveiturnar séu góðar til síns brúks, en að kvikmyndir að sömu stærðargráðu og Dune eigi ekki heima þar. Hann segir einnig að þetta muni minnka tekjumöguleika myndarinnar, vegna ólöglegs niðurhals, sem muni fara á blússandi ferð um leið og myndin komi á HBO-Max. Það muni svo í framhaldinu skaða möguleikana á fleiri Dune-myndir verði gerðar.

Villeneuve, sem hefur áður gert kvikmyndir á borð við Sicario og Arrival, er annar stóri kvikmyndagerðarmaðurinn sem talar gegn áætlunum Warner. Leikstjóri Warner-myndarinnar Tenet, Christopher Nolan, lét einnig í sér heyra í síðustu viku. Hann er allt annað en sáttur við að þessi ákvörðun hafi verið tekin án samráðs við listræna stjórnendur myndanna. Þessi tilfæring Warner hefur einnig áhrif á Wonder Woman 1984, Matrix 4 og Godzilla vs. King Kong, sem munu samtímis koma út á HBO-Max og í kvikmyndahúsum.

spot_img
spot_img
spot_img

Innlendar Fréttir