Lena skýrir frá Facebook-brellunni sem hjálpaði henni að léttast um 12 kg – DV

0
220

Margir reyna hina ýmsu megrunarkúra og aðferðir til að reyna að losna við aukakílóin. Þar má nefna LKL, Ketó og föstu. En það er spurning hvort það gefi betri árangur að nota Facebookaðferðina. Samkvæmt niðurstöðu rannsóknar, sem vísindamenn við háskólann í Halmstad í Svíþjóð gerðu, þá léttast þeir, sem birta reglulegar færslur um þyngdartap sitt á Facebook, að meðaltali 20% meira en aðrir. Aftonbladet skýrir frá þessu.

400 manns tóku þátt í rannsókninni, sem stóð yfir í þrjá mánuði. Helmingurinn birti færslur á Facebook um glímu sína við aukakílóin en hinn helmingurinn skrifaði ekkert um það.

Ulf Agerup, einn vísindamannanna, sagði að niðurstaða rannsóknarinnar sé að þeir sem skrifa um þyngdartap sitt á Facebook léttist meira en þeir sem gera það ekki. Fyrir allan hópinn hafi munurinn verið 20%. Þessi helmingur sé einnig ánægðari með þyngdartapið en hinn helmingurinn.

Lena, sem tók þátt í rannsókninni, tók undir þetta. Hún birti mynd af sér, sem var tekin áður en tilraunin hófst, og síðan aðra að henni lokinni. Þegar tilrauninni var lokið skoðaði hún myndina og var mjög sátt við árangurinn sem hún náði.

„Ég er sannfærð um að hvatning og „likes“ frá Facebookvinum mínum hafi hjálpað mér að léttast um 12 kg á þremur mánuðum,“ sagði hún.