Lítill áhugi á túnfiskveiðum

0
123

Túnfiskurinn er stór og verðmætur, en veiðar á tegundinni hafa ekki verið stundaðar í atvinnuskyni frá 2016 þegar afla var landað í Grindavík. mbl.is/Þórður Arnar Þórðarson

Þrátt fyrir að stjórnvöld hafi gripið til lagabreytinga, til að hvetja íslenskar útgerðir til að hefja skipulagðar veiðar á bláuggatúnfiski, hefur enn sem komið er enginn sýnt þeim áhuga. Tvísýnt er því hvort breytingarnar sem stjórnvöld hafa gripið til munu duga til þess að Íslendingar fari að stunda veiðarnar að einhverju marki, að því er fram kom í umfjöllun Morgunblaðsins á fimmtudag.

Fiskistofa auglýsti 31. mars síðastliðinn að búið væri að opna fyrir umsóknir um leyfi til línuveiða á bláuggatúnfiski og að gert væri ráð fyrir að íslenskar útgerðir gætu veitt 212 tonn á árinu. Í boði voru þrjú leyfi sem veita heimild til að stunda línuveiðar á túnfiski á tímabilinu 1. ágúst til 31. desember.

„Það hafa engar umsóknir borist um túnfiskveiðar og enginn sýnt þeim áhuga,“ segir í svari Fiskistofu er leitað var upplýsinga um stöðu leyfisveitinganna. Umsóknarfrestur er þó til 1. júní og því ekki útilokað að breyting verði þar á.

Lesa má umfjöllunina í heild sinni í Morgunblaðinu.