Lítur bjartsýnum augum á komandi kolmunnaveiði

0
183

T.h. Hálfdan Hálfdanarson í brúnni á Berki ásamt skipstjóranum Hjörvari Hjálmarssyni. Ljósmynd/Síldarvinnslan

„Ég held að menn séu afar bjartsýnir. Í febrúarmánuði bárust þær fréttir frá Norðmönnum að það hefði verið óvenju mikið af kolmunna að sjá vestur af Írlandi,“ segir Hálfdan Hálfdanarson, skipstjóri á Berki NK, í færslu á vef Síldarvinnslunnar um kolmunnaveiðarnar sem hefjast brátt.

„Veiðin var svo mikil að menn lentu í bölvuðum vandræðum og veiðarfærin slitnuðu jafnvel aftan úr skipunum. Þessi fiskur gengur norður eftir og er yfirleitt kominn á gráa svæðið á milli 10. og 15. apríl. Í fyrra hófum við veiðarnar 11. eða 12. apríl. Mönnum líst semsagt afar vel á kolmunnaveiðarnar framundan,“ segir Hálfdan.

Gert er ráð fyrir að Síldarvinnsluskipin Barði NK, Beitir NK og Börkur NK haldi til kolmunnaveiða eftir páskana. Veiðin mun hefjast syðst í færeysku lögsögunni, á hinu svonefnda gráa svæði.

Beitir á kolmunnaveiðum á síðasta ári. Síldarvinnsluskipin halda á kolmunnamiðin eftir páska. Ljósmynd/Síldarvinnslna: Helgi Freyr Ólason