1 C
Grindavik
17. janúar, 2021

Lýsir á­hrifunum sem Moderna-sprautan hafði á hann

Skyldulesning

Bandarískur karlmaður sem tók þátt í bóluefnisrannsókn lyfjafyrirtækisins Moderna kveðst hafa fengið vægar aukaverkanir eftir seinni skammt. Hann segir reynsluna ekki beint „dans á rósum“ en kveðst hiklaust myndu láta sprauturnar aftur yfir sig ganga.

Þau bóluefni við kórónuveirunni sem komin eru lengst í átt að almennum markaði, bóluefni Pfizer/BioNTech og Moderna, byggja á svokallaðri mRNA-tækni. Þau innihalda erfðaefni kórónuveirunnar sem myndar broddprótín (e. spike protein) sem hjálpar henni að komast inn í frumur.

Bóluefnin eru gefin í tveimur skömmtum með nokkurra vikna millibili. Bæði efnin eru sögð veita um 95 prósent vörn gegn veirunni og hafa verið prófuð á tugum þúsunda sjálfboðaliða.

Enginn dans á rósum en ómaksins virði

Yasir Batalvi, 24 ára Boston-búi, er einn þeirra. Hann segir í samtali við CNN að hann hafi skráð sig til þátttöku í Moderna-bóluefnisrannsókninni í júlí og ekki endilega átt von á því að verða valinn. Reynslan hafi sannarlega ekki verið neinn „dans á rósum“ en hann kveðst hiklaust myndu láta sprauta sig aftur.

Batalvi segir að tilfinningin við fyrstu sprautuna hafi verið svipuð þeirri sem maður fær við hefðbundna flensusprautu. Hann hafi verið stífur í handleggnum þar sem hann var sprautaður en að öðru leyti hafi hann ekki fundið fyrir neinu. Öðru máli hafi þó gegnt um seinni sprautuna.

„Ég fékk talsverðar aukaverkanir eftir að ég fékk seinni skammtinn. Þegar ég fékk seinni skammtinn leið mér vel á meðan ég var á spítalanum. En kvöldið var erfitt. Ég fékk vægan hita, varð þreyttur og fékk kuldaköst.“ Hann hafi svo braggast strax daginn eftir.

Þess verður þó að geta að Batalvi veit ekki hvort hann hafi verið sprautaður með bóluefninu eða lyfleysu. Rannsóknin er tvíblinduð og vísindamennirnir sem framkvæmdu hana vita það því ekki heldur. Miðað við aukaverkanirnar kveðst Batalvi þó alveg viss í sinni sök; hann hafi fengið bóluefnið.

Viðtal við Batalci má horfa á í spilaranum hér fyrir neðan.

Aukaverkanir á borð við þær sem Batalvi lýsti eru nokkuð algengar hjá þeim sem eru bólusettir – og eru mismunandi milli manna. Sérfræðingar segja þær eðlilegar og ekkert til að hafa áhyggjur af. Engar alvarlegar aukaverkanir hafa komið fram við bóluefnarannsóknir Pfizer og Moderna.

Sýnir að ónæmiskerfið sé að virkjast

Ingileif Jónsdóttir prófessor í ónæmisfræði sagði í fréttaskýringaþættinum Kompási í október að aukaverkanir eins og þær sem Batalvi lýsir væru „óþægindi“ sem sýndu að ónæmiskerfið væri að fara í gang.

„Að finna slíkt er gagnlegt því það segir að ónæmissvarið sé að virkjast,“ sagði Ingileif. Þá benti hún á að aukaverkanir af bóluefni væru langtum skárri en veikindi og eftirköst af Covid-19.

„Hjá flestum tekur síðan mjög langan tíma að ná aftur heilsu. Og fólk situr eftir með þreytu, slappleika, vöðvaverki, jafnvel einhverja hjartasjúkdóma, storkuvandamál og fleira. Öndunarfæravandamál. Sem er áberandi hjá mörgum og getur jafnvel setið eftir í nokkra mánuði eftir að að fólk hefur sýkst af sjúkdómnum. Síðan er ákveðinn hluti af þessu fólki sem heldur áfram með langtímaveikindi. Hversu stór hluti það er, það vitum við ekki almennilega,“ sagði Ingileif.

Svandís Svavarsdóttir heilbrigðisráðherra sagði á Alþingi í dag að bólusetningar við kórónuveirunni hefjist á fyrstu vikum næsta árs. Hjarðónæmi við veirunni gæti orðið að veruleika strax á fyrsta ársfjórðungi. Ísland muni líklega fá bóluefni frá Pfizer fyrir 85 þúsund manns, fyrir 115 þúsund manns frá Astrazeneca og 40 þúsund frá Moderna.


Tengdar fréttir


Heilbrigðisráðherra segir að bólusetningar við kórónuveirunni hefjist á fyrstu vikum næsta árs. Hjarðónæmi við veirunni geti orðið að veruleika strax á fyrsta ársfjórðungi.


Skrifað verður undir samning Íslands við framleiðanda bóluefnis Pfizer í næstu viku um kaup á bóluefni sem dugar fyrir 85.000 einstaklinga. Vonir standa til að Pfizer fái skilyrt markaðsleyfi frá Lyfjastofnun Evrópu 29. desember þegar fjallað verður um hvort stofnunin geti mælt með því að lyfið verði tekið í notkun.


Barack Obama, fyrrum Bandaríkjaforseti, segist hiklaust munu láta bólusetja sig ef Anthony Fauci, æðsti sóttvarnasérfræðingurinn vestanhafs, segir það óhætt.


Faraldur nýju kórónuveirunnar náði methæðum í Bandaríkjunum í gær. 3.150 manns dóu og samtals voru fleiri en hundrað þúsund manns á sjúkrahúsi vegna Covid-19. Rétt rúmlega 200 þúsund greindust smitaðir af Covid-19.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.


Fleiri fréttir

Sjá meira

Innlendar Fréttir