0 C
Grindavik
19. janúar, 2021

„Maður er bara klökkur vegna stórkostlegra Íslendinga sem hjálpa okkur“

Skyldulesning

Múlasýsludeild Rauða krossins hefur borist liðsauki frá Akureyri við áfallahjálparteymið fyrir austan vegna náttúruhamfaranna. Berglind Sveinsdóttir, formaður deildarinnar segir ásóknina í þá aðstoð sem er í boði vera til marks um það mikla áfall og erfiðleika sem Seyðfirðingar glíma við um þessar mundir. Hún kveðst vera meyr vegna samstöðu og hjálpsemi sem Íslendingar hafi sýnt.

Rýma þurfti bæinn í heild sinni á svipstundu eftir að stórhættuleg aurskriða féll í bæinn og hreif með sér flest sem varð á vegi hennar, meðal annars hús. Ljóst sé að áfallið sé mikið og að íbúar allir eigi um sárt að binda. Því hafi hún verið afar þakklát þegar liðsauki barst frá viðbragðsteymi Akureyrar.

„Þær [konurnar í áfallahjálparteyminu] eru hérna í báðum fjöldahjálparstöðum. Þær eru til staðar. Þetta úrræði hefur verið mikið nýtt sem segir okkur að áfallið er mjög mikið. Þetta er erfitt fyrir fólk. Við verðum hérna til taks áfram. Það er alltaf hægt að leita til okkar hjá Rauða krossinum og fá aðstoð, spjall og kaffisopa. Það er algjörlega nauðsynlegt.“

Berglind segir að þrátt fyrir hamfarir og eyðileggingu hafi íbúar Seyðisfjarðar staðið þétt saman og staðið sig með ólíkindum vel. Rýming bæjarins í heild sinni hafi gengið vonum framar.

„Þetta er náttúrulega risastór pakki en ég segi nú bara í fúlustu alvöru að þetta fólk er stórkostlegt, þetta tók svo stuttan tíma.“

Hún segir fólk fullt þakklætis vegna hjálpseminnar sem landsmenn hafi sýnt í verki. Fjölmargir hafi boðið fram íbúðir sínar og verið til taks.

„Landsmenn hafa sent okkur hitt og þetta, ýmislegt til að hafa í matinn, kaffibrauð og margt fleira. Við þökkum bara kærlega fyrir það. Svo hafa líka margir styrkt okkur sem er algjörlega frábært. Maður er bara klökkur vegna stórkostlegra Íslendinga sem hjálpa okkur.“

Berglind hvetur alla íbúa Seyðisfjarðar til að leita til Rauða krossins ef þeir telji þörf á aðstoð, hvar sem þeir eru staddir á landinu. Alltaf sé hægt að hringja í 1717 eða leita til svæðisstjórnar viðkomandi.

En sem formaður svæðisstjórnar, hefði þig einhvern tímann getað órað fyrir því að þú stæðir frammi fyrir svona stóru verkefni?

„Nei, ég get alveg sagt þér það. Ég er mjög hreinskilin með það að þetta er eitthvað sem ég bjóst aldrei við en þetta er gríðarlegur lærdómur fyrir okkur öll. Við erum búin að vera að ræða mikið saman núna á fundum og erum sammála um að þetta sé mikill reynslubanki sem við erum komin með núna“.


Tengdar fréttir


Íbúar utan hættusvæða á Seyðisfirði hafa fengið að snúa aftur til síns heima, tveimur sólarhringum eftir að bærinn var rýmdur. Þó er áfram hætta á frekari skriðuföllum. Íbúar segjast hlakka til að komast heim en kvíða því að sjá eyðilegginguna í bænum.


Hildur Þórisdóttir, mannauðsstjóri og fyrrum forseti bæjarstjórnar á Seyðisfirði, segir það vera kraftaverk að ekkert manntjón hafi orðið þegar aurskriðan féll í gær. Bjarki Borgþórsson, lögreglumaður og eiginmaður Hildar, var staddur nærri staðnum sem skriðan féll ásamt öðrum viðbragðsaðilum og mátti litlu muna að verr færi.


Páll Thamrong Snorrason segir aðgerðir á Seyðisfirði í gærkvöldi hafa gengið vel en fólk sé margt óttaslegið og kvíðið fyrir næstu skrefum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.


Fleiri fréttir

Sjá meira

Innlendar Fréttir